Azərbaycan, Bakı, 3 noyabr /Trend, müxbir Azad Həsənli/
2014-cü ilin sentyabr ayında Azərbaycanın bank sektorunun kapitallaşması 2013-cü ilin analoji dövrünə nisbətən 20,25 faiz artaraq cari il oktyabrın 1-nə 3,792 milyard manat təşkil edib. Trend-in məlumatına görə, bu barədə Azərbaycan Mərkəzi Bankının (AMB) 2014-cü ilin 9 ayının yekunu üzrə statistik hesabatında deyilir.
AMB-nin məlumatına görə, kapitalı 10 milyon manatdan çox olan (Mərkəzi Bankın qüvvədə olan normativ tələbləri) bankların sayı hesabat dövrünün yekunu üzrə 42 ədəd təşkil edib ki, bu da 2013-cü il sentyabrın sonuna olan göstərici ilə müqayisədə 1 ədəd çoxdur. Ölkənin bütün banklarının məcmu kapitalının həcmində bu kateqoriyadan olan bankların xüsusi çəkisi qeyd edilən dövrün yekunu üzrə 99,8 faiz təşkil edib.
Bir bankın kapitalı 5-10 milyon manat, bir bankın kapitalı isə 3,5-5 milyon manat səviyyəsində formalaşıb. Hesabat dövründə ölkənin bütün banklarının məcmu kapitalında bu kateqoriyadan olan bankların xüsusi çəkisi 0,1 faiz təşkil edib.
2014-cü ilin sonuna AMB-nin bankların məcmu kapitalının minimum həcminə qarşı tələbi 50 milyon manat səviyyəsində müəyyənləşib.
2014-cü ilin üçüncü rübünün yekunu üzrə Azərbaycanda 44 bank fəaliyyət göstərir: 42 kommersiya və iki dövlət bankı. Xarici kapitallı bankların sayı 22 ədəddir. Onlardan yeddisində xarici kapitalın xüsusi çəkisi 50 faizdən 100 faizədək, 13 bankda isə 50 faizədək təşkil edir. Həmçinin ölkədə xarici bankların iki filialı fəaliyyət göstərir.
