Azərbaycan, Bakı, 3 iyun /Trend, müxbir Azad Həsənli/
Azərbaycan Polşa, Mərkəzi və Şərqi Avropanın enerji təhlükəsizliyini gücləndirməyə kömək edəcək çox mühüm tərəfdaşdır. Trend-in məlumatına əsasən, bunu Polşanın Baş nazirinin müavini, İqtisadiyyat naziri Yanuş Pexoçinski deyib.
O bildirib ki, Azərbaycan yaxşı iqtisadiyyatı olan sabit ölkədir: "Ötən il Mərkəzi Avropada bir neçə yeni qaz xətti layihəsi - "Nabucco West" və "Cənub qaz dəhlizi" - dayandırıldı. Bu gün dəqiq olan bir məsələ var - bu layihələr reallaşdırılmayacaq. Bu sahədə reallaşdırılacaq yeganə layihə Azərbaycan layihəsidir (TAP). Bu səbəbdən Polşa, Mərkəzi və Şərqi Avropa Azərbaycan və SOCAR (Azərbaycan Dövlət Neft Şirkəti) ilə əməkdaşlığın əhəmiyyətli dərəcədə genişləndirilməsində maraqlıdır".
Y.Pexoçinski hesab edir ki, Azərbaycan və Aİ arasında yaxşı əlaqələr formalaşıb: "Azərbaycan Avropaya böyük və çox doğru təklif edib, ona görə, Berlin, Paris və digər İttifaq ölkələrində olduğum zaman Azərbaycanın Aİ üçün böyük əhəmiyyətini qeyd edirəm. Avropa dəqiq müəyyənləşdirməlidir ki, bu layihəyə hansı dəstəyi verə bilər".
Baş nazirin müavini qeyd edib ki, Polşanın təşəbbüsü ilə yaradılan Aİ Enerji İttifaqı Aİ sərhədlərindən xaric tərəfdaşların şəffaf iş prinsipi olan ittifaqı olmalıdır: "Enerji təhlükəsizliyi, rəqabət qabiliyyətli sənaye və son istehlakçı üçün maksimum sərfəli qiymət naminə birləşmək lazımdır. Mübarizə əsaslı rəqabəti aradan qaldırmalı, əməkdaşlıq əsasında rəqabət yaratmalıyıq".
Y.Pexoçinski həmçinin bildirib ki, hazırkı vəziyyətdə belə böyük müqavilələrin imzalanması zamanı tərəflər arasında inamın olması çox vacib məsələdir: "Qazı almaq olar, inamı isə yox. Azərbaycan prezidenti İlham Əliyev və nazirlər ilə münasibətlərdə cəlbedici tərəf təcrübədə sınaqdan çıxmış inamdır".
Onun sözlərinə görə, Azərbaycanın strateji mövqeyini nəzərə alsaq, Polşa bu ölkə ilə bütün sahələrdə, nəinki dövlət, həmçinin özəl səviyyədə əməkdaşlığı inkişaf etdirməlidir: "Energetika, qaz, neft - bunlar xammaldır. Onların böyük əhəmiyyəti var, lakin inam səviyyəsini də artırmaq bir o qədər əhəmiyyətlidir. Satılan neftin qiyməti baxımından İraqın sizinlə rəqib olmasına baxmayaraq, Azərbaycan 22-ci Beynəlxalq Caspian Oil & Gas-2015 sərgisinin açılış mərasiminə İraqın Neft nazirini dəvət edib. Beləliklə, Azərbaycan öz rəqiblərinə hörmət etdiyini göstərir. Azərbaycan investisiyalar uğrunda mübarizə aparıb, eyni zamanda rəqiblərinə hörmətlə yanaşmaqla yeni rəqabət növü yaradır. Ölkə faktiki olaraq biznesin yeni strategiyasını - rəqabətdə əməkdaşlıq - həyata keçirir".
