Bakı. Trend:
AGBank məzənnə stabilliyini təmin edəcək yeni məhsul hazırlayıb.
Bankın təqdim etdiyi yeni əmanət məhsulu məzənnədən asılı olmayaraq sahibinə gəlir əldə etmək fürsətini qazandırır.
Bankdan Trend-ə verilən məlumata görə, "Sabit məzənnə" adlanan yeni depozit növü manat ilə yerləşdirilsə də, Mərkəzi Bankın həmin günə ABŞ dollarının manata qarşı olan rəsmi məzənnəsinə bağlı olur. Rəsmi məzənnədə 3%-dən çox dəyişikliklər olduğu halda aradakı fərq əmanət sahibinə bank tərəfindən ödənilir.
Belə ki, manat ilə yerləşdirilən əmanətin dövrü bitdiyi zaman əsas vəsait ABŞ Dollarının həmin tarixə olan məzənnəsi ilə hesablanıb müştəriyə qaytarılır. Bu isə o deməkdir ki, ABŞ Dollarının qeyri sabit olması ilkin məbləğə öz təsirini göstərmir. Aşağıdakı nümunədə olduğu kimi:
1600 manat yerləşdirir, rəsmi məzənnə 1 ABŞ dolları - l.6 manat təşkil edirsə məbləğ olduğu kimi qalır.
Əmanətin müddəti bitdikdə rəsmi məzənnə 1ABŞ dolları - l.8 manat olduqda müştəriyə 1800 manat - 3% (çıx 3%) vəsait qaytarılır.
Rəsmi məzənnə 1ABŞ dolları - l.4 manat təşkil etsə, müştəriyə müvafiq olaraq 1600 manat - 3% (çıx 3%) vəsait qaytarılır.
"Sabit məzənnə" əmanəti manat ilə 12 ay müddətinə illik 9% ilə rəsmiləşdirilir. Minimal məbləğ 100 AZN təşkil edir.
Faizlər müştərinin istəyi ilə aylıq və ya ilin sonunda ödənilir.
Depozitin məbləğindən asılı olaraq sahibinə plastik kart hədiyyə olunur.