BMT-nin Ərzaq və Kənd təsərrüfatı Təşkilatının (Food and Agriculture Organization of the United Nations FAO) mütəxəssisi Stepan Tanik Bakıdadır. Kənd təsərrüfatı nazirliyində Trend ə bildirilib ki, səfərin əsas məqsədi fermer təsərrüfatlarında informasiya və monitorinq sistemlərinin təşkilində texniki yardıma dair yeni layihə üzrə hazırlıq işlərinin həyata keçirilməsidir.Layihənin dəyəri $276 min təşkil edir.
Layihənin əsas məqsədi fermer təsərrüfatlarının səmərəli fəaliyyətinin qiymətləndirilməsi, adıçəkilən obyektlərdə keçirilən tədbirlərə dair informasiya tətbiq edilməsi üçün məlumatlar bazası sisteminin yaradılmasıdır.
Nazirlikdə qeyd olunub ki, adıçəkilən layihənin rəhbəri olan Stepan Tanik kənd təsərrüfatı naziri İsmət Abbasov tərəfindən qəbul edilib.Görüşdə yeni layihənin gerçəkləşdirilməsinə aid məsələlər müzakirə edilib.
"Bu, təşkilat nümayəndələrinin həmin layihə çərçivəsində ilkin missiyasıdır" -deyə dövlət qurumunda bildirilib.
Həftənin sonunadək davam edəcək səfərdə layihəyə aid olan bəzi texniki məsələlər dəqiqləşdiriləcək.
Nazirlikdə bildirilib ki, həmin layihə çərçivəsində FAO -nun növbəti missiyası 3 aydan sonra gözlənilir.Həmin missiyada layihənin gerçəkləşdirilməsi planlaşdırılır.
Ərzaq və kənd təəsrrüfatı təşkilatı (FAO) BMT-nin 1945-ci ilin oktyabrın 16-da əsası qoyulmuş ilk ixtisaslaşdırılmış müəssisəsidir.Təşkilatın üzvlərinin sayı 150 nəfər olaraq bildirilir.Təşkilatın məqsədi kənd təsərrüfatı, ərzaq mallarının istehsalı, meşə və balıq emal məhsulları sənayesi sahəsində texniki yardımın təmin edilməsidir. FAO-nun mənzil-qərargahı Romada yerləşir.
