Mayın 3-6-da Heydərabadda (Hindistan) keçiriləcək Asiya İnkişaf Bankının İdarəetmə Şurasının 39-cu iclasında Azərbaycanın təqdimat mərasimi keçiriləcək. Bu barədə Trend ə iqtisadi inkişaf nazirinin müavini Mikayıl Cabbarov bildirib. Tədbirdə M.Cabbarov çıxış edəcək.
İclasda Azərbaycan Respublikası ilə yanaşı daha 3 ölkə- İndoneziya, Çin və Filippinin də təqdimat mərasimləri keçiriləcək.
"Biz Bakı-Tbilisi-Ceyhan neft, Bakı-Tbilisi-Ərzurum qaz kəməri kimi qlobal layihələri nəzərə alaraq Azərbaycanın təqdimatına böyük maraq göstəriləcəyinə ümid edirik. Bununla yanaşı, ölkə qeyri-neft sektorunun inkişaf dinamikasını da saxlayır", - deyə M.Cabbarov bildirib.
M.Cabbarov həmçinin, Asiya Bankının yeni prezidenti Xaruxiko Kuroda (Haruhiko Kuroda) ilə də görüşəcək. Görüşdə bankın ölkə ilə əməkdaşlıq strategiyası, eləcə də AİB ilə işlərin yeni formatı müzakirə olunacaq. Nazir müavinin sözlərinə görə, hazırki formatda dəyişikliklər layihələrin nəzərdən keçirilməsi prosesinin sürətləndirilməsi məqsədi ilə zəruridir. Onun sözlərinə görə, bu gün müzakirə mərhələsində olan bir çox layihələr mövcuddur ki, onların nəzərdən keçirilməsi xeyli vaxt aparır.
1999-cu ildən, yəni Azərbaycanın AİB ilə əməkdaşlığa başladığı andan ümumi dəyəri $104 mln olan 3 layihə maliyyələşdirilib. Asiya bankının xətti ilə $10,5 mln. qrant ayrılıb və Yaponiyanın yoxsulluğun azaldılması Fondunun $5,85 mln.qrantı təqdim olunub.