Azərbaycan Nəqliyyat Nazirliyi layihənin dəyərini azaltmaq məqsədi ilə Bakının dövrələmə yollarında avtomobil zolaqlarını azaltmağı təklif edir. Bu barədə Trend ə nazirliyin maliyyə-kredi departamentinin investisiya siyasəti sektorunun müdiri Mirqasım Abbasov xəbər verib. Bir sıra işlərin azaldılması nəticəsində layihənin dəyəri əvvəlki 58 milyon ABŞ dolları ilə müqayisədə 50 milyon ABŞ dollarından azalacaq.
Bununla əlaqədar tender şərtləri yenidən nəzərdən keçirilməlidir. Şirkətlərin təklif etdiyi qiymətlər yüksək olduğundan, keçirilən tenderin nəticələri höküməti qane etmir. Birinci yeri tutmuş şirkət işləri 83 milyon ABŞ dollarına həyata keçirməyi təklif edib, üçüncü yeri tutan şirkətin təklif etdiyi məbləğ isə 100 milyon ABŞ dollarını keçir. Hökümət layihənin yenidən baxılmasını zəruri hesab edir, çünki bu layihə öz aktuallığını itirib. Müşfiq qəsəbəsindən keçməklə, Sahil qəsəbəsindən Z.Tağıyev qəsəbəsinə qədər uzanan avtomobil yolunun yenidən qurulmasını bura daxil etmək, Lökbatan qəsəbəsindən Qurd qapısı ilə şəhərə giriş isə daha məqsədəuyğun olardı.
Layihəni 14,9 milyon ABŞ dolları məbləğində kredit təqdim edən Küveyt inkişaf fondu, 10 milyon ABŞ dolları məbləğində kredit təqdim edən Ərəbistan inkişaf fondu və Azərbaycan hökümətinin 3,5 milyon ABŞ dolları məbləğində vəsaiti hesabına həyata keçirmək nəzərdə tutulur. Ərəb maliyyə institutlarının krediti illik 2,5 faiz dərəcəsi ilə dördillik güzəşt dövrü ilə 20 il müddətinə verilib. Layihənin bahalaşması ilə əlaqədar vəsaitin çatışmayan hissəsi də Azərbaycan tərəfindən təqdim oluna bilər.
Layihənin dəyəri İordaniyanın "Arab Konsalt" şirkəti tərəfindən yolun təkrar texniki araşdırılmasından sonra dəqiqləşdirilib. Layihənin bahalaşması kommunikasiyaların köçürülməsinin, həmçinin yolun 5 km uzunluqdakı hissəsinin və layihənin ötən texniki-iqtisadi əsaslandırılmasında nəzərdə tutulmayan bir sıra digər infrastrukturların tikintisinin zərurəti ilə izah olunur. O cümlədən, yolu yeni avtovağzal kompleksi ilə birləşdirəcək yeni körpünün tikintisi də nəzərdə tutulur. Bundan başqa, tikinti materialları və xidmətlərinin qiyməti də 44-45% -ə qədər qalxıb.