2006-cı ilin birinci yarısında Azərbaycan Dövlət Dəmir Yolu İdarəsi (ADDYİ) tərəfindən yük daşımalarının həcmi 15,1 milyon ton təşkil edib, bu isə planda nəzərdə tutulduğundan 3 milyon 311,6 min ton çoxdur. Bu barədə Trend ə Azərbaycan Dövlət Dəmir Yolu İdarəsindən xəbər veriblər. Bu müddət ərzində ümumi həcmdən 4 milyon ton neft və neft məhsulu daşınıb.
Bu ilin altı ayı ərzində dəmiryolu vasitəsilə 10,8 milyon ton yük göndərilib və bu ötən ildəkinə nisbətən 1 milyon 958,1 min ton çoxdur. Göndərilən yüklərin ümumi həcmindən 7,9 milyon tonu neft və neft məhsullarının payına düşür.
Sutkalıq neft yüklənməsi proqnozlaşdırılmış 693 vaqon əvəzinə 734,7 vaqon və ya 106 % təşkil edib.
Lokomotivlərin səmərəliliyi üzrə proqnoz da 110% yerinə yetirilib. Yük qatarının orta çəkisi 2156 ton təşkil edib, bu isə ötən ilin bu dövrünə nisbətən 46 ton çoxdur.
Məlumatda həmçinin qeyd olunub ki, yük dövriyyəsi üzrə tarif planı 129,6% yerinə yetirilib və bu ötən ildəkindən 26,6% çoxdur.
Hesabat dövrü ərzində 2,7 milyon sərnişin daşınıb və 9,9 milyon AZN gəlir əldə olunub.