"Rosprirodnadzor" Xəzər dənizi üzrə neft və neft məhsullarının nəqli zamanı bir korpuslu tankerlərin istismarına qarşı çıxış edir. Trend in verdiyi xəbərə görə, həmin təşkilat başçısının müavini Oleq Mitvol bu bəyanatı verib.
Onun sözlərinə görə, "neftin bir korpuslu tankerlərdə nəqli bu ekologiya regionu üçün həqiqi təhlükədir. Xəzər dənizi - qapalıdır. Əgər ora nəsə düşsə, onun tamamilə yox olması üçün ən azı 50 il lazımdır".
Azərbaycan Xəzər Dəniz Gəmiçiliyindən Trend ə verilən xəbərə görə, Xəzər Dəniz Gəmiçiliyi indi öz gəmilərini təkmilləşdirir və onları ikinci bortla təchiz edir.
Hazırda Xəzər Dəniz Gəmiçiliyi 12 334 ton dedveytli "General Aslanov" tankerini təkmilləşdirir. Bu tanker təhlükəsizlik üzrə beynəlxalq konvensiyaların tələb etdiyi kimi ikinci bortla təchiz edilir.
Gəmiçilik artıq analoji layihə üzrə tikilmiş "Şamxor" tankerini ikinci bortla təchiz edib. Yaxın vaxtlarda analoji layihəli üçüncü "Qafur Məmmədov" tankerində təkmilləşdirilmə işləri aparılacaq. Gəmiçiliyin balansında cəmi üç belə tanker var.
Beynəlxalq dəniz təşkilatı (İMO) tərəfindən qəbul edilmiş konvensiyaya görə gəmilərin təkmilləşdirilməsi tələb olunur. Konvensiyaya əsasən 12 min ton su tutumuna malik bütün gəmilər mümkün qəzalar nəticəsində yükün dənizə tökülməsinin qarşısını almaq üçün 2007-ci ilin sonunadək ikinci bortla təchiz olunmalıdır. Bir gəminin təkmilləşdirilməsi üçün təxminən 500-600 ABŞ dolları tələb olunur.
2009-cu ildə ikinci bortu olmayan 7 min ton yükgötürmə qabiliyyətinə malik gəmilərin nəql etməsi qadağan ediləcək. Hazırda Xəzər Dəniz Gəmiçiliyinin balansında 9 belə gəmi var. Təkmilləşdirilmiş gəmilər yeni gəmilərə bərabər tutulacaq.
Xəzər Dəniz Gəmiçiliyinin Rusiyadan aldığı yeni tankerlər tikilərkən ikinci bortla təchiz olunurlar. Hazırda Gəmiçilk RF-dən iki 8 min ton və üç 13 min ton yükgötürmə qabiliyyətinə malik gəmi alıb. Yaxın vaxtlarda 13 min ton yükgötürmə qabiliyyətinə malik daha iki tanker Bakıya gətiriləcək.