Hazırda 10 Azərbaycan gəmisi Rusiya daxili sularından keçid üçün verilən icazədən yararlanıb. Yaxın günlərdə daha 2 gəminin Rusiya sularından keçməsi gözlənilir. Bu barədə Trend ə Xəzər Dövlət Dəniz Gəmiçiliyi (XDDG) idarəsinin rəhbəri Aydın Bəşirov bildirib.
Onun sözlərinə görə, Azərbaycan gəmilərinin Rusiya daxili sularından keçməsi ilə bağlı vəziyyət artıq bir neçə ildir ki, dəyişməz qalıb. İstənilən gəmi yalnız bir dəfə Xəzərə gələrək Qara dənizə qayıda bilər. Bu problemin həlli üçün Rusiyanın normativ hüquq bazasında dəyişiklik etmək lazımdır.
Bu il XDDG Rusiya hökumətindən 14 gəmiyə 25 icazə alıb. Bunun 11-i Xəzərə daxil olmaq, 14-ü isə Xəzərdən çıxmaq üçün nəzərdə tutulub.
Lakin alınmış icazəyə baxmayaraq, Azərbaycan uzunmüddətli müqavilə imzalamağa ümid edir. Bu məsələni həll etmək üçün Rusiyada həm qanunvericiliyin, həm də Dəniz Məcəlləsinin dəyişdirilməsi lazımdır.
Hazırda Azərbaycan gəmiləri üçün birtərəfli keçid haqqı $20 - $25 min təşkil edir, Rusiya gəmiləri üçün isə bu rəqəm $5-$6 minə bərabərdir. Beləliklə, Azərbaycan gəmilərinin Rusiyanın daxili sularından keçməsi Rusiyaya böyük gəlir gətirir.
