Sentyabr ayında 2006-cı maliyyə ili üçün TACİS milli fəaliyyət planı çərçivəsində Avropa Birliyinin Azərbaycanın texniki peşə məktəblərinə yardım layihəsi üzrə texniki tapşırığın hazırlanması başlayır. AB-nin Azərbaycana texniki yardım proqramının (Tacis) Koordinasiya bürosunun icraçı direktoru Əsgər Ələkbərovun Trend ə verdiyi xəbərə görə, 2006-cı il üçün fəaliyyət planı çərçivəsində digər layihələrdən fərqli olaraq, bu layihə üzrə texniki tapşırığın hazırlanması üçün European Training Foundation şirkəti cəlb olunacaq.
Təhsil, İqtisadi İnkişaf, Əmək və Əhalinin Sosial Müdafiəsi Nazirlikləri bu yardımları alacaq. Texniki -peşə təhsili sisteminin təkmilləşdirilmə layihəsinin ümumi büdcəsi 3 mln. avro təşkil edir, bunlardan 1,5 min avro avadanlığın alınması üçün sərmayə qismində nəzərdə tutulub.
"Layihənin ilkin ideyası pilot bölgələrinin cəlb olunmasından, metodikanın hazırlanmasından, sərmayələrin bölgələrdəki orta və texniki-peşə məktəblərinə qoyulmasından ibarət idi. Hazırda layihənin prioritet istiqamətləri dəqiqləşdirilir", - deyə Ə.Ələkbərov qeyd edib.