Avqustun 24-də Bərdə zona Baytarlıq Laboratoriyasında "quş qripi" xəstəliyinin diaqnostikası və profilaktikası ilə əlaqədar treninq keçiriləcək. Trend in Kənd Təsərrüfatı Nazirliyi yanında Dövlət Baytarlıq Xidmətinin məlumatına istinadən xəbər verdiyi kimi, BMT-nin Ərzaq və Kənd Təsərrüfatı Təşkilatının (FAO) dəstəyi ilə keçiriləcək treninqdə Bərdə, Ağdam və Tərtər baytarlıq idarələrinin mütəxəssisləri işitirak edəcək. Daha əvvəl analoji tədbirlər Lənkəran, Sabirabad, Quba və Bərdədə keçirilib.
Treninqləri FAO-nun "quş qripi" üzrə mütəxəssisi Q.Kiani və Dövlət Baytarlıq Xidmətinin xüsusi təhlükəli xəstəliklər üzrə epizootoloji nəzarət sektorunun müdiri K.Əsədov aparacaq.
Tədbir zamanı xəstəliyin yaranma tarixi, onun törətdiyi fəsadlar, yayılması və insana yoluxması, xüsusi geyimlərin istifadəsi, patoloji materialların götürülməsi, xəstə və ölmüş quşların zərərsizləşdirilməsi qaydaları, diaqnostika və qabaqlayıcı tədbirlər barədə məlumat veriləcək.
