Respublika üzrə torpaq kadastrının yaradılma layihəsinin ilkin qiymətləndirilməsini aparmaq üçün layihənin rəhbəri (bankda torpaq inzibatçılığı üzrə mütəxəssis) Geyvin Adlinqtonun başçılıq etdiyi Dünya bankı missiyası oktyabrın 2-dən 10-dək Bakıda olacaq. DB-nin Bakı nümayəndəliyindən Trend ə verilən xəbərə görə, bankın ekspertləri Azərbaycan höküməti ilə birgə həmçinin gələcək layihənin tərkib hissələrini də müzakirə edəcəklər.
Layihənin benefisiarları Nazirlər Kabineti yanında Daşınmaz əmlakın reyestrinin Dövlət xidməti, Torpaq və xəritə çəkmə üzrə Dövlət komitəsi, Dövlət əmlakının idarə olunması üzrə Dövlət komitəsi və Ədliyyə Nazirliyidir. Layihə çərçivəsində həmin orqanlarda yüksək səviyyəli keyfiyyətin təmin olunması üçün informasiya texnologiyalarının inkişafı nəzərdə tutulub. Həmçinin tələb olunan miqyasın göstərilmədiyi və hər bir tikilinin əhatə olunmadığı sahələr üzrə yeni xəritələrin tərtib olunma zərurəti gözdən keçirilir.
Hələ layihənin Direktorlar şurasına təqdim edilmə müddəti haqqında razılıq əldə olunmayıb. Halbuki DB layihəni 2007-ci ilin əvvəlində bankın təsdiqinə verməyi təklif edir, lakin hökümət bu prosesin surətləndirilməsində və onun 2006-cı ilin sonunadək təsdiq olunmasında maraqlı olduğunu bildirib.
Layihənin dəyəri ona daxil ediləcək tərkib hissələrinin qiymətləndirilməsi və dəqiqləşdirilməsindən sonra müəyyən olunacaq. DB-nin AR höküməti ilə tərəfdaşlıq strategiyasında 30 mln. ABŞ dolları nəzərdə tutulub və bu məbləğ bank tərəfindən veriləcək.
