10 gün ərzində Kapitalbank Hindistanın i-Flex - FlexCube şirkətinin proqram təminatının tətbiqi ilə bağlı vəziyyəti aydınlaşdıracaq. Bankın idarə heyətinin sədr müavini Yaşar Məmmədovun Trend ə verdiyi xəbərə görə, birinci mərhələdə i-Flex proqramından bankın baş ofisinin binasında yerləşən birinci Bakı filialında istifadə edilməsi planlaşdırılır. Proqram fəaliyyətdə olan PT ilə paralel şəkildə tətbiq olunacaq.
Onun Kapitalbankın qalan filial şəbəkələri üzrə fəaliyyətinin genişləndirilməsi komissiyanın qarşısına qoyulmuş məsələlərin həllindən asılı olacaq. Vəsait köçürmələri ilə problemlər olduğundan, bank yeni proqramın tətbiqinə ehtiyatla yanaşır.
Əvvəllər ehtimal olunurdu ki, oktyabr ayından etibarən proqram fəaliyyət göstərən proqramla paralel şəkildə tətbiq olunacaq. Ləngimələrlə əlaqədar bank müqavilənin gerçəkləşdirilməsi müddətini uzatmaq üçün Dünya bankına müraciət edib. Müqavilənin predmeti əsas özəyin və 12 modulun tədarükündən ibarətdir. Razılaşmaya əsasən, i-Flex şirkəti bir il ərzində proqrama xidmət göstərilməsini öz üzərinə götürəcək, sonrakı 4 ildə isə xidmətə görə vəsait ödəniləcək.
Müqavilənin dəyəri 800 min SDR təşkil edir. Bu vəsaitlər Azərbaycanın maliyyə sektoruna texniki yardım üçün DB krediti çərçivəsində ayrılıb.