Azərbaycan Milli Bankı nəzdində fəaliyyət göstərən Azərbaycan İpoteka Fondu (AİF) vasitəsi ilə ipoteka kreditlərinin verilməsi üçün 2007-ci il dövlət büdcəsində 20 mln. manat nəzərdə tutulub. Bunu bu gün AİF-in icraçı direktoru Faiq Məmmədov Xəzər ingüzar inteqrasiya klubunun görüşündə bəyan edib.
Bu vəsaitlər 2006-ci il üçün ayrılıb və əgər onlar ilin sonuna kimi mənimsənilməsə, gələn ilə keçiriləcək.
"Amma 2006-ci ilin sonuna kimi və ya ən geci 2007-ci ilin əvvəlində sosial ipotekanı tətbiq etmək niyyətində olduğumuz nəzərə alınarsa, ipoteka kreditlərinə tələbat artacaq. Onda bizə əlavə vəsaitlər lazım olacaq. İpoteka kreditləri dövlətin sosial-iqtisadi siyasətinin bir hissəsi olduğundan, əgər ipoteka kreditləşməsinə sağlam maraq və tələbat olarsa, vəsait ayrılacaq", - deyə F. Məmmədov bildirib.
AİF-in hesablamalarına görə, 2010-cu ilə kimi olan müddətdə 6 mindən 10 minə qədər ailənin ipoteka krediti ilə təmin olunması üçün alınan mənzildən asılı olaraq, 200 mln.-dan 250 mln. manata qədər vəsait tələb oluna bilər.
Hazırda AİF ipoteka kreditlərini 2005-ci il dövlət büdcəsindən ayrılmış 6 mln. manat məbləğində vəsait hesabına verir.