Avropa Komissiyası ilk dəfə Avropa qonşuluq siyasəti (AQS) çərçivəsində Azərbaycana dövlət büdcəsinin sektor dəstəyi vasitəsini reallaşdırmağı təklif edib. Avropa Birliyinin Azərbaycana texniki yardım proqramının (Tacis) koordinasiya bürosunun icraçı direktoru Əsgər Ələkbərovun Trend ə verdiyi xəbərə görə, dövlət büdcəsinə keçiriləcək vəsaitlər hökümətin prioritetlərindən asılı olaraq, müxtəlif sektorların dəstəyi üçün nəzərdə tutulub.
Həmin təkliflər bu həftə AB-nin Azərbaycan üzrə məsul şəxsi Anjelo Borqoninin başçılıq etdiyi nümayəndə heyətinin Bakıya səfəri çərçivəsində Maliyyə Nazirliyində nəzərdən keçirilib.
Azərbaycan tərəfinin son qərarı Avropa komissiyası missiyasının 2007-ci ilin yanvar ayında nəzərdə tutulmuş növbəti səfəri çərçivəsində səsləndiriləcək. "Bu cür vasitə dövlət maliyyəsinin idarə edilməsi sisteminin müəyyən standartlara uyğunlaşdırılmasını tələb edir. Bununla əlaqədar bu sahədə dövlət siyasətinin qiymətləndirilməsi üçün missiyanın Azərbaycana səfəri nəzərdə tutulub", - deyə Ə.Ələkbərov qeyd edib.