2007-ci ildən etibarən ARDNF-in gəlirlərinin gözlənilən artımı ilə əlaqədar və xarici təcrübədən istifadə nəzərə alınmaqla, fondun aktivlərini idarə etmək üçün yeni xarici menecerlərin cəlb edilməsi planlaşdırılır. Trend in xəbər verdiyi kimi, bu barədə keçirilmiş mətbuat konfransında ARDNF-in icraçı direktoru Şahmar Mövsümov bildirib. Fransanın Societe General Asset Management bankı ilə müqavilə ləğv edildikdən sonra (Neft Fondu bankın idarəsinə $50 mln. vəsait vermişdi) iki menecer qalıb. Bunlar fondun aktivlərindən sərəncamında $42,4 mln vəsait olan Clarident bankı (Credit Suisse bölməsi) və Deutschebank Asset Management-dir ($72,6 mln.). ARDNF-in investisiya siyasətinə əsasən, fond xarici menecerlərin idarəçiliyinə aktivlərin 40%-ə qədərini verə bilər.
Ş.Mövsümovun sözlərinə görə, hazırda fəaliyyət göstərən xarici menecerlər ARDNF-in aktivlərinin 8-9%-ni idarə edir. "Yeni idarəçilərin cəlb edilməsi prosesi müəyyən vaxt çəkəcək. Belə ki, onların seçilməsi üçün tender elan edilməlidir. Ancaq düşünürəm ki, biz dünya praktikasında aparıcı menecerləri cəlb edə biləcəyik", - deyə o qeyd edib.
Ş.Mövsümovun sözlərinə görə, fondun vəsaitlərini idarəetmə strategiyası daim diqqət mərkəzindədir. Ancaq bu, beynəlxalq maliyyə bazarlarında dəyişikliklərdən asılıdır. "Strategiyamız buna əsaslanır. Belə ki, fondun aktivləri dünya bazarlarında idarə olunur. Tədqiqatlar göstərir ki, yaxın bir neçə il ərzində dünya maliyyə bazarlarında heç bir dəyişiklik baş verməyəcək və bu təhlil hər il aparılır. Buna görə də bizim investisiya strategiyamızda dəyişikliklər gözlənilmir. Fondun gəlirlərinin artması, o cümlədən dünya bazarlarının konyukturası baxımından biz investisiya strategiyasını optimallaşdırmağa çalışırıq", - deyə Ş.Mövsümov bildirib.
ARDNF yaxın perspektivdə investisiya siyasətinə hazırladığı təkliflərdə aktivləri 3 hissəyə bölməyi təklif edir - xərclər portefli (fondun büdcəsinə uyğun müəyyən olunacaq), sabit və fövqəladə hallar portfeli, depozit portfeli (o cümlədən gələcək nəsil üçün nəzərdə tutulmuş). 3-cü portfelin vəsaitləri uzunmüddətli investisiyalar (10 il) üçün nəzərdə tutulmalı və böyük gəlir götürmək üçün səhmlərə yerləşdirilməlidir.