Azərbaycan, Bakı /müx. Trend İ.Xəlilova / Azərbaycan Bankları Assosiasiyasının (ABA) Latviyanın Kommersiya Bankları Assosiasiyası ilə əməkdaşlığa dair saziş layihəsi imzalaması üçün ABA rəhbəri Eldar İsmayılov avqustun sonuncu dekadasında Riqaya səfər edəcək. Bu barədə bazar ertəsi qurumun icracı direktoru Fərhad Əliyev məlumat verib. Onun sözlərinə görə, sənəd artıq ABA rəyasət heyəti səviyyəsində razılaşdırılıb və imzalanmaq üçün məsləhət görülüb.
Səfər zamanı həmçinin Latviya Banklar Assosiasiyasının iş mexanizmi ilə tanışlıq olacaq. Belə bir təklif iyunun 7-də bu qurumun prezidenti Teodors Tveriyonsun Azərbaycana səfəri zamanı gəlib. Onun Bakıya səfəri Azərbaycan Milli Bankının Latviyanın ölkəmizdəki səfirliyi ilə birgə ipoteka kreditləşməsinə həsr edilən seminardakı iştirakı ilə əlaqəli olub. Latviyalı qonaqlar ölkələrinin bu sahədəki təcrübəsi ilə bölüşüblər.
ABA həmçinin digər ölkələrin bank assosiasiyaları ilə ikitərəfli əlaqələr qurur. İyunda Ukrayna və Belarus bank assosiasiyaları ilə əməkdaşlığa dair sənədlər imzalanıb. Artıq Özbəkistan və Qazaxıstan təmsilçiləri ilə saziş layihələri hazırlanıb. Onların imzalanması payızdan tez olmayacaq.
