Azərbaycan, Bakı, 12 mart/ Trend müxbir S.Əliyev/ "Mişovdağ - Kəlamətdin" quru yatağının işlənilməsi ilə məşğul olan Karasu Operating Company (KAOC) iki quyunun qazılmasını həyata keçririb. Bu barədə Azərbaycanın Dövlət Neft Şirkətindən məlumat veriblər. Quyunun layihə dərinliyi təqribən 1100 metr təşkil edir.
2008-ci ildə müqavilə sahəsinə daxil olan yataqlarda neft-qaz əməliyyatlarının intensivləşdirilməsi üzrə planların nəticəsində Karasu Operating Company (KAOC) və Kura Valley Operating Company (KVOC) əməliyyat şirkətlərinin büdcəsi $100 mln.-u ötəcək. KAOC "Mişovdağ-Kəlamətdin", KVOC isə "Padar-Hərami" quru yatağının işlənməsi ilə məşğul olur.
Bu il "Mişovdağ" yatağınən işlənilməsi daha intesiv şəkildə aparılacaq, istismar quyularının qazılması, lay təzyiqinin qorunması üçün suyun geri vurulması planlaşdırılır. Bundan əlavə mövcud quyuların təmiri də həyata keçiriləcək.
2007-ci ildən başlayaraq "Kəlamətdin" yatağında suyun laya sınaq vurulması həyata keçirilir ki, bu iş 2008-ci ildə də davam etdiriləcək.
Əməliyyat şirkətlərinin iştirakçı tərkibi belədir: KAOC - GCM Global Energy - 85 faiz, ARDNŞ - 15 faiz, KVOC - GCM Global Energy - 80 faiz, ARDNŞ - 20 faiz.
"Mişovdağ-Kəlamətdin" quru yatağının işlənməsi üzrə müqavilə 2000-ci il oktyabrın 12-də imzalanıb. Karasu Operating Company 2007-ci ildə bu yataqlardan 265,3 min ton neft hasil edib.
"Padar-Hərami" quru yatağının işlənməsinə dair müqavilə 1999-cu il aprelin 27-də imzalanıb. Kura Valley əməliyyat şirkəti 2007-ci ildə bu yataqlardan 1,85 min ton neft hasil edib.