Azərbaycan, Bakı, 23 aprel / Trend / Azərbaycan Bakı-Tbilisi-Ceyhan neft kəmərinin imkanlarının hazırkı 1 mln. barreldən sutkada 2 mln. (ildə 100 mln. ton) barrel neftə qədər genişləndirilməsi mümkünlüyünü istisna etmir. Bu barədə çərşənbə günü BTC layihəsinin iştirakçısı olan Azərbaycan Dövlət Neft Şirkətinin (ARDNŞ) yüksək vəzifəli nümayəndəsi bildirib.
"Boru kəmərinin ötürmə imkanlarının sutkada istər 1,2-1,6 mln. barr., istərsə də 2 mln barrelə qədər genişləndirilməsi müzakirə olunur. Danışıqlar genişləndirilmə müddəti və üsulları da daxil olmaqla ətraflı aparılır", - deyə ARDNŞ nümayəndəsi bildirib.
Layihənin operatoru olan BP şirkəti artıq boru kəmərinin ötürmə imkanlarını sutkada 1 mln. barreldən 1,2 mln. barrelə qədər genişləndirməyə başlayıb. "BP Azerbaijan" BTC boru kəmərinin baş nasos stansiyasının (PSA-1) yerləşdiyi Səngəçal terminalında yaxın vaxtlarda boru kəmərinə kimyəvi reagentlərin vurulması üzrə qurğunun tikintisinə başlayacaq. Bunun köməkliyi ilə BTC-nin nəql imkanlarının genişləndirilməsi nəzərdə tutulur. Tikinti işləri "Azfen" Birgə Müəssisəsi (ARDNŞ - 60 faiz, Türkiyənin "Tekfen" şirkəti isə 40 faiz iştirak payına malikdir) həyata keçirəcək. Hazırda BTC boru kəməri ilə sutkada təxminən 750 min barrel neft nəql olunur. Bununla yanaşı, boru kəmərinin nominal nəql imkanları artıq 1 mln. barrelə çatıb. İlin sonuna qədər stabil nəql həcminin sutkada 1 mln. barrelə çatdırılması planlaşdırılır.
ARDNŞ nümayəndəsinin sözlərinə görə, boru kəməri imkanlarının genişləndirilməsi məsələsində onun iştirakçılarının maraqları fərqlənir.
"Biz hesab edirik ki, BTC boru kəmərinin genişləndirilməsi layihəyə yatırılan vəsaitin 20-ci illərdə am olaraq əldə olunmasından sonra Azərbaycana məxsus pay faizinə mənfi təsir göstərməməlidir", - deyə ARDNŞ nümayəndəsi bildirib. Azərbaycana aid pay ölkənin şəxsi neftinin BTC üzrə vurulma həcmindən asılıdır. Boru kəməri genişləndirildiyi zaman Azərbaycanın payı azala bilər, "çünki nəql üçün digər neft həcmləri ortaya çıxacaq".
"BTC-nin genişləndirilməsi boru kəmərinə yatırılan vəsait əldə edildikdən sonra boruya sahiblik faizinin azalmaması üçün Azərbaycanın neft hasilatının artmasından sonra həyata keçirilməlidir", - deyə ARDNŞ nümayəndəsi vurğulayıb.
Boru kəmərinin nəql imkanlarının genişləndirilməsi həm Azərbaycanın artan neft həcmləri, həm də Qazaxıstandakı digər istehsalçıların neftinin nəqli üçün lazımdır. BTC boru kəmərinin səhmdarlarından biri və "Azəri"-"Çıraq"-"Günəşli" (Bu layihə iştirakçılarının əksər hissəsi BTC-nin səhmdarlarıdır) yatağının işlənməsi üzrə layihənin iştirakçısı olan Amerikanın "ChevronTexaco" şirkəti Qazaxıstanın "Tengiz" yatağından hasil etdiyi neftin boru kəməri üzrə nəqlində maraqlı olduğunu ifadə edib. Neftin Xəzər dənizi ilə tankerlərlə Bakıya çatdırılması və Türkiyənin Aralıq dənizindəki Ceyhan limanına nəqli üçün BTC-yə vurulması nəzərdə tutulub.
BTC neft kəmərinin ümumi uzunluğu 1768 kilometdir. Boru kəmərinin 443 km Azərbaycan, 249 km Gürcüstan; 1076 km isə Türkiyə ərazisndən keçir. Boru kəmərinin tikintisinə 2003-cü ilin aprel ayında başlanılıb, neftlə doldurulması isə 2005-ci il mayın 18-da həyata keçrilib.
BTC-nin tikintisi 4 mlrd. dollara başa gəlib. Tikinti işləri, boru kəmərinin doldurulması, maliyyə xərcləri və bank faizlərinin ödənilməsi bu xərclərə daxil deyil. Maliyyə kreditinin ümumi məbləği 2,6 mlrd. təşkil edir.
"BTC Co"nun səhmdarları: BP (30,1 faiz); "AzBTC" (25 faiz); "Chevron" (8,9 faiz); "StatoilHydro" (8,71 faiz); "TRAO" (6,53 faiz); "Eni" (5 faiz); "Total" (5 faiz); "Itochu" (3,40 faiz); "Inpex" (2,5 faiz); "ConocoPhillips" (2,50 faiz) və "Hess" (2,36 faiz).
Müəlliflə əlaqə saxlamaq üçün elektron ünvan : [email protected]
