Azərbaycan, Bakı, 09 iyun / Trend / Cari ilin yanvar-may aylarında Azərbaycanda qaz təhvili 4 mlrd. 403 mln. kubmetr təşkil edib ki, bunun da təxminən 2 mlrd. 799 mln. kubmetri şəxsi vəsaitləri hesabına yataqlardan təbii qaz hasil edən Azərbaycan Dövlət Neft Şirkətinin (ARDNŞ) payına düşüb. Bu barədə ARDNŞ-dən bildiriblər.
Məlumatda bildirilir ki, analoji dövr ərzində təhvil verilən qazın yerdə qalan 1 mlrd. 604 mln. kubmetri Azərbaycan Beynəlxalq Əməliyyat Şirkətinin (ABƏŞ) neft ilə bərabər "Azəri-Çıraq-Günəşli" yatağından hasil etdiyi səmt qazı və "Şahdəniz" müqavilə sahəsinin payına düşüb.
May ayında dövlətə təxminən 896 mln. 307 min kubmetr qaz təhvil verilib ki, bunun da 576 mln. 486 min kubmetri ARDNŞ-nin, qalan 319 mln. 820 min kub metri isə ABƏŞ və "Şahdəniz" layihəsinin payına düşüb.
1994-cü ildə imzalanan PSA tipli müqaviləyə əsasən, müqavilə üzrə neft-qaz əməliyyatlarının aparılması üçün konsorsiuma lazım olan həcm istisna olmaqla, "Azəri-Çıraq-Günəşli" yatağından neftla yanaşı, qaz da hasil edən ABƏŞ Azərbaycana havayı səmt qazı verir.