Azərbaycan, Bakı, 23 iyun / Trend , müxbir A.Bədəlova / ABŞ Dövlət Enerji İnformasiyaları İdarəsinin (EIA) hesablamasına görə, 2008-ci ildə Azərbaycanda neft emalının həcmi 2007-ci ildə olduğu kimi qalaraq sutkada 399 min barel təşkil edəcək. Azərbaycanda neft emalının həcmi 2004-cü ildən dəyişməz olaraq qalır. 1995-ci ildən 2003-cü ilədək (daxil olaraq) ölkədə neft emalının həcmi sutkada 442 min barel səviyyəsində olub.
Neft məhsulları ümumi illik emal həcmi 20 mln. ton neft olan iki Bakı NEZ bazasında istehsal olunur. Hər iki NEZ Azərbaycan Dövlət Neft Şirkətinin (ARDNŞ) tərkibinə daxildir. ARDNŞ hər il şəxsi vəsaitlər hesabına quru və dəniz yataqlarında hasil etdiyi neftin 6 milyon bareldən çoxunu emal edir.
EIA-nın hesablamalarına əsasən, Qazaxıstanda 2005-ci ildən 2008-ci ilədək emal həcmi dəyişməz olaraq 345 min barel qalıb, bu da 1997-2004-ci illərlə müqayisədə sutkada 82 min barel azdır.
Türkmənistanda emal həcmi 1995-ci ildən 2008-ci il daxil olmaq şərtilə, sutkada 237 min barel səviyyəsində dəyişməz olaraq qalıb.
Türkiyədə son beş il ərzində bu göstərici sutkada 714 min barel təşkil edir. 2002-2003-cü illərdə emal həcmi sutkada 719 min barel olub, 2001-ci ildə isə sözügedən göstərici sutkada 694 min barelə bərabər olub.
İranda 2006-cı ildən 2008-ci il də daxil olmaqla, neft emalının həcmi sutkada 1 451 min barel təşkil edib, 2003-2005-ci illərdə bu göstərici sutkada 1 474 min barel təşkil edib.
Müəlliflə əlaqə saxlamaq üçün elektron ünvan: [email protected]
