Azərbaycan, Bakı, 20 avqust/ Trend , müxbir V.Şərifov/ BTC Co boru kəməri şirkəti çərşənbə günü Bakı - Tbilisi - Ceyhan (BTC) neft kəmərinin avqusutn əvvəlində partlayış nəticəsində zədələnmiş Türkiyə hissəsinin sınağına başlayıb, - BTC layihəsinin operatoru olan BP Azerbaijan şirkətindən bildiriblər.
"Bu gün zədələnmiş sahə sınaqdan keçiriləcək. Ondan dövri olaraq müəyyən həcmdə neft nəql ediləcək", - BP Azerbaijan-ın nümayəndəsi bildirib.
BTC-nin Türkiydəki hissəsi Azərbaycan neftinin Ceyhan limanının yerləşdiyi Aralıq dənizinə ixracının normallaşdırılması məqsədilə sınaqdan keçirilir. Boru kəmərinin bu hissəsinin təmiri ilə BTC layihəsinin iştirakçısı Botas şirkəti məşğuldur.
Avqustun 5 - də axşam saatlarında Bakı -Tbilisi - Ceyhan neft kəmərinin Türkiyənin Ərzincan vilayətindən keçən hissəsində partlayış baş verib və nəticədə 30 saylı nasosda yanğın başlayıb. Yanğın avqustun 11- də söndürülüb.
Xəzərin Azərbaycan sektorunda "Azəri" - "Çıraq" - "Günəşli" yataqlarının tammiqyaslı işlənilməsini həyata keçirən Azərbaycan Beyunəlxalq Əməliyyat Şirkəti (operator BP) bu boru kəmərində yanğınla əlaqədar hasilatı azaldıb. BP- də hasilatın nə qədər azaldığını bildirmirlər, lakin iyulun yekunları üzrə o, sutkada, orta hesabla, 870 min bareldən çox olub.
Hasilat Bakı-Tbilisi-Ceyhan boru kəməri ilə ixracın dayandırılması və BP şirkətininin Səngəçal neft terminalında çənlərin dolması ilə əlaqədar azaldılıb.
BTC neft kəmərinin ümumi uzunluğu 1768 kilometrdir; 443 km - Azərabaycan, 249 - Gürcüstan, 1076 km - Türkiyə ərazisindən keçir. Boru kəmərinin tikintisi 2003 - cü ildə, onun neftlə doldurulması isə, 2005 - ci il mayın 18 -də başlayıb.
BTC-nin tikintisi $4 mlrd. başa gəlib. Bu tikinti işləri, boru kəmərinin doldurulmasına çəkilən xərclərdir. Maliyyə xərcləri və bank faizlərinin ödənilməsi bura daxil deyil. Ümumi maliyyə kreditinin məbləği $2,6 mlrd. təşkil edir.
BTC Co-nun səhmdarları aşağıdakılardır: BP (30,1 faiz); AzBTC (25 faiz); Chevron (8,90 faiz ); Statoil (8,71 faiz ); TRAO (6,53 faiz ); Eni (5 faiz ); Total (5 faiz ); Itochu (3,40 faiz ); Inpex (2,50 faiz ); ConocoPhillips (2,50 faiz ) və Amerada Hess (2,36 faiz ).
Müəlliflə əlaqə saxlamaq üçün elektron ünvan: [email protected]