Qazaxıstan, Astana, 02 sentyabr / Trend , müxbir K.Konırova/ "KazMunayqaz" şirkəti Azərbaycan Dövlət Neft Şirkəti (ARDNŞ) ilə Ceyhanda (Türkiyə) neft emalı zavodunun (NEZ) tikintisi üzrə layihənin reallaşdırılması üçün konsorsiumun yaradılması və tərkibinin müəyyənləşdirilməsi ilə bağlı danışıqlar aparır. Bu barədə Trend -ın xüsusi müxbirinə adının gizli saxlanılması şərti ilə "KazMunayqaz"dakı mənbədən bildiriblər.
"Layihənin iki variantı var. Birinci - 7,5 mln. ton üzrə iki mərhələdə, ildə 15 mln. ton neft gücündə zavod tikintisi. İkinci variant - ildə 20 mln. ton gücündə zavod", - deyə sözçü bildirib.
Həmsöhbətin fikrincə, belə planlar tam olaraq realdır, belə ki, Türkiyənin Ceyhan limanı perspektivdə eyni zamanda bir neçə neft kəmərinin xammal tədarük edəcəyi neft hasilatı üzrə iri qovşaq olacağını vəd edir.
"İdealda burada ildə 177 mln. tonadək neft cəmlənməlidir və burada NEZ-in olmaması ağılsızlıq olardı. Bu zavodun tikintisi reallaşdırılmalıdır", - deyə sözçü hesab edir. Onun sözlərinə görə, NEZ-in tikintisi orta hesabla təqribən altı il vaxt aparacaq, bu dövr ərzində isə Qazaxıstanın "Kaşaqan" yatağından neft çıxarılmalıdır.
Layihənin TİƏ-si artıq hazırdır, lakin reallaşdırılması Ceyhanda torpaq sahəsinin alınması ilə bağlı mürəkkəbdir.
"Orada torpağın bir hissəsi hökumətə məxsusdur, digər hissəsi isə özəl mülkiyyətdir", - deyə "KazMunayqaz"ın nümayəndəsi bildirib.
Sözçü bildirib ki, "KazMunayqaz" bu layihədə "beşinci tərəfdaş - ARDNŞ-ın dəstəyinə bel bağlamaq istərdi".
"Memorandum imzalananda biz ARDNŞ-ı da dəvət etdik, hesab etdik ki, biz güclərimizi birləşdirməliyik: "Eni", "Kaşaqan" layihəsinin operatoru kimi, "Oil India" - TİƏ-ni hazırlayan şirkət kimi, "Calik Enerji"nin simasında yerli tərəfdaş və ARDNŞ - BTC və neft sahiblərindən biri kimi. Lakin memorandum imzalanarkən "qapı açıq qalıb" və indi konsorsiumun yaradılması və tərkibi ilə bağlı danışıqlar aparılır", - deyə mənbə bildirib.
Yeni NEZ-də neft məhsullarının geniş spektri istehsal olunacaq: yüksək oktanlı benzinin bütün növləri, mazut, dizel yanacağı, aviasiya kerosini və neft kimya məhsulları.
Məqalə müəllifi ilə əlaqə ünvanı - [email protected]