Azərbaycan, Bakı, 27 dekabr / Trend / Yanvar - noyabrda Azərbaycandan boru kəməri nəqliyyatı və dəmir yolu ilə 32,2 mln. tondan çox neft ixrac olunub. Bu barədə Dövlət Gömrük Komitəsindən məlumat verilib.
Cari il ərzində Bakı -Tbilisi -Ceyhan (BTC) boru kəməri ilə 28,5 mln. ton neft nəql olunub. BTC vasitəsilə "Azəri - Çıraq - Günəşli" yataqlarından hasil olunan yüngül neft nəql olunur. Neft kəmərinin operatoru BP - dir. "Azəri - Çıraq - Günəşli" yataqlarının işlənməsi layihəsinin yalnız iki xarici iştirakçısı - Amerikanın Exxon Mobil və Devon şirkətləri öz neft paylarını BTC vasitəsilə nəql etmirlər. Bu şirkətlər BTC-nin tikintisinə sərmayə yatırmayıblar və öz neft paylarını dəmir yolu vasitəsilə Gürcüstanın Batumi limanına çatdıraraq, oradan satırlar.
Dövlət Gömrük Komitəsinin məlumatlarına görə, yanvar - noyabrda Bakı - Novorossiysk vasitəsilə 1,3 mln. ton neft ixrac edilib. Bu boru kəməri ilə, əsasən, SOCAR-ın (Azərbaycan Dövlət Neft Şirkəti) şəxsi vəsaitlər hesabına yataqlardan hasil etdiyi neft, xarici iştirak payı ilə birgə müəssisə və əməliyyat şirkətlərinin ölkənin quru yataqlarından çıxardığı xammal nəql olunur.
Komitə qeyd edir ki, may - noyabrda Bakı - Supsa boru kəməri ilə təqribən 375,5 min ton neft ixrac olunub. Boru kmərinin operatoru BP - dir.
Dövlət Gömrük Komitəsinin məlumatında bildirilir ki, yanvar - noyabrda dəmir yolu n əqliyyatı vasitəsilə təqribən 2,1 mln. ton neft ixrac edilib. Dəmir yolu ilə Gürcüstanın Qara dəniz limanlarına Amerikanın Exxon Mobil və Devon şirkətlərinin "Azəri - Çıraq - Günəşli" yataqlarından hasil etdiyi yüngül neftlə yanaşı, Azərbaycandan keçməklə, Qazaxıstan və Türkmənistandan nəql olunan tranzit xammalı da tədarük olunur.