Gürcüstan, Tbilisi, 21 yanvar/ Trend , müxbir N.Kirtsxaliya/
Yanvarın 26 - 28 - də Budapeştdə keçiriləcək "Nabukko" sammitində Gürcüstanın nümayəndə heyətinə Baş nazirin birinci müavini, Gürcüstanın maliyyə naziri Nika Qilauri rəhbərlik edəcək. Bu barədə çərşənbə günü Gürcüstan hökumətinin mətbuat xidmətindən bildiriblər.
Gürcüstan nümayəndə heyətinin tərkibində energetika naziri Aleksandr Xetaquri və Gürcüstanın Neft və Qaz Korporasiyasının rəhbəri Zurab Cancqava da olacaq.
Gürcüstanın nümayəndə heyətinə Baş nazir Qriqol Mqaloblişvilinin rəhbərlik etməsi planlaşdırılmışdı, lakin Münhendə müayinədən keçməsi səbəbindən o, sammitdə iştirak edə bilməyəcək. Hökumətin mətbuat xidmətinin məlumatına görə, Baş nazir Almaniyadan yanvarın 27- də gələcək.
Gürcüstan həkimlərinin məlumatına görə, böyrəklərin iltihab prosesilə bağlı Mqaloblişvili üçün dörd həftəlik müalicə kursu müəyyən olunub, yanvarın 17-də onda baş ağrıları, ümumi narahatlıq, taxikardiya və arterial təzyiq müşahidə olunub və bu səbəbdən o, Respublika xəstəxanasına yerləşdirilib.
Gürcü və alman uroloları arasında konsilium zamanı müalicənin nəticələrinin qiymətləndirilməsi üçün Baş nazirin Almaniyaya göndərilməsi qərara alınıb.
Məqalə müəllifi ilə əlaqə ünvanı - [email protected]
