Azərbaycan, Bakı, 21 avqust / Trend , müxbir E.İsmayılov /
ARDNŞ (Azərbaycan Respublikası Dövlət Neft Şirkəti) Gürcüstanda SOCAR Georgia Gas şirkətinin (SOCAR Energy Georgia-nın törəmə müəssisəsi) istifadəsində olan 31 qaz təsərrüfatının infrastrukturunun qazlaşdırılması və bərpası çərçivəsində lazım olan investisiyanın həcmini təqribən iki dəfə artırmağı planlaşdırır. Bu barədəcümə günü SOCAR Energy Georgia-dakı mənbədən məlumat verilib.
"İlkin mərhələdə bu layihə çərçivəsində nəzərdə tutulan minimal məbləğ 40 milyon dollar təşkil edirdi. Bu minimal limit idi. Paylaşdırıcı şəbəkələrin bərpası nəzərə alınmaqla, qazlaşdırma işinə məxaricin həcmi təxminən 70-80 milyon dollar təşkil edə bilər", - mənbədən deyilib.
Mənbədən bildirildiyi kimi, hazırda qazlaşdırma prosesi davam etdirilir və artıq sentyabrda bir çox kəndlərə qazın verilməsinə başlamaq planlaşdırılır.
SOCAR Georgia Gas şirkətinin rəhbəri Anar Məmmədovun bir müddət əvvəl dediyi kimi, hazırda şirkətin istifadəsində olan qazpaylayıcı şəbəkələrin tələbatı ildə təxminən 80-90 milyon kubmetrdir. Üçillik proqram çərçivəsində bu şəbəkələrin istifadəçilərinin sayının təxminən 60 min-dən 150 min abonentə artırılması planlaşdırılır. İstifadəçilərin sayının artırılmasından sonra şəbəkələrin tələbatı da azı iki dəfə artacaq. İlin birinci yarısında şirkətin istifadədə olan bölüşdürücü şəbəkələri çərçivəsində bütün mənbələr üzrə 40 milyon kubmetrə qədər qaz göndərilib. İlin ikinci yarısında da təxminən bu həcmdə qaz tədarük ediləcək.
Keçən ilin 26 dekabrında ARDNŞ və Gürcüstan hökuməti Kaxeti, Msxeta-Mtianeti, Şida və Kvemo-Kartli, Acariya, Quriya, İmereti, Sameqrelo kimi regionları əhatə edən 30 qazbölüşdürücü təsərrüfatın və qazbölüşdürücü şəbəkənin idarəetməyə verilməsinə dair müqavilə imzalayıblar. Bu şəbəkələr 24 şirkət tərəfindən istismar edilib.
Apreldə SOCAR Energy Georgia şirkəti həmçinin azərbaycanlıların kompakt yaşadığı Marneuli rayonunun qazbölüşdürücü şəbəkəsini istifadəyə alıb. Marneulinin qazbölüşdürücü şəbəkəsi 31 qaz təsərrüfatıdır.
Əvvəllər Marneulidə qazbölüşdürücü şəbəkənin sahibi ARDNŞ-dən qaz alıb onun Marneuli ərazisində satışı ilə məşğul olan "Wissol" şirkəti idi. Hazırda bu istiqamətdə bütün işləri SOCAR Energy Georgia həyata keçirir. Bu qazbölüşdürücü şəbəkələrin əldə olunması, inkişafı və idarə olunması 40 milyonluq investisiya proqramına daxil deyil.
Məqalə müəllifi ilə əlaqə ünvanı: [email protected]
