Azərbaycan, Bakı, 07 oktyabr / Trend , müxbir E.İsmayılov/
ARDNŞ oktyabrın 28-də "Bakı-Novorossiysk" boru kəməri üzrə Azərbaycan neftinin yüklənməsini başa çatdıracaq. Bu barədə ARDNŞ-dəki mənbədən deyilib. Oktyabrda ümumilikdə bu boru kəməri üzrə 248 min ton Azərbaycan nefti yüklənəcək. Sentyabr ayında bu göstərici 140 min ton olub.
Mənbənin dediyinə görə, hazırda boru kəməri üzrə sutkalıq 10 min tona yaxın Azərbaycan nefti yüklənir. Qrafikə müvafiq olaraq isə oktyabrın 23-dən yüklənmənin gündəlik həcmi 6 - 6,5 min tonadək azalacaq.
Proqnozlara müvafiq olaraq, bu boru kəməri üzrə yüklənmənin həcmi 240 min ton, dekabrda isə 140 min ton təşkil edəcək.
ARDNŞ Novorossiysk limanından öz neftinin yüklənib boşaldılmasını həyata keçirir. ARDNŞ bu ilin yanvar-avqust aylarında bu boru kəməri ilə 1,7 milyon tondan çox neft ixrac edib. 2008-ci ilin müvafiq dövründə bu göstərici 865 min tona yaxın olub. Avqust ayında bu boru kəməri ilə 240 min tona yaxın neft ixrac edilib. Ötən ilin avqust ayında isə bu göstərici 83 min tona yaxın olub.
2009-cu ildə ARDNŞ "Bakı-Novorosiysk" boru kəməri ilə neftin həcmini 2,5 milyon tonadək artırmaq niyyətindədir. 2008-ci ildə bu göstərici 1,3 milyon ton olub.
Bu gün "Bakı-Novorossiysk" boru kəməri üzrə neftin nəql edilməsi zamanı Azərbaycan Novorossiysk limanında Ural markalı neft əldə edir.
2007-ci ilin sonunadək bu boru kəmərinin operatoru ABƏŞ olub, sonradan isə bu funksiyanı ARDNŞ-yə verib.
Məqalə müəllifi ilə əlaqə ünvanı: [email protected]
