Azərbaycan, Bakı, 29 mart / Trend , müxbir E.İsmayılov/
Hazırda ARDNŞ (Azərbaycan Respublikası Dövlət Neft Şirkəti) Gürcüstana sutkada 1,3 milyon kubmetr qaz ixrac edir. Bu barədə cümə axşamı neft-qaz sahəsindəki mənbə bildirib.
"Şirkət tərəfindən Gürcüstana qaz ixracı hazırda da davam edir və sutkada 1,3 milyon kubmetr səviyyəsindədir", - mənbə deyib.
ARDNŞ Gürcüstana qaz tədarükünü Azərbaycanın Qazax rayonunda iki ölkəni birləşdirən boru kəməri vasitəsilə həyata keçirir. Bu boru kəməri vasitəsilə qazın vurulma gücü ildə 3 milyard kubmetrə yaxın təşkil edir.
2008-ci ilin noyabr ayında Azərbaycan və Gürcüstan arasında ARDNŞ-nin 2009-cu ildən başlayaraq növbəti 5 il ərzində Gürcüstan bazarında fəaliyyətini aktivləşdirmək imkanı yaradan saziş imzalanıb. Memoranduma əsasən, ARDNŞ layihənin reallaşması üçün SOCAR Georgia Gas törəmə müəssisəsini yaradıb.
Həmçinin, 2008-cil il dekabrın 26-da ARDNŞ və Gürcüstan hökuməti 30 qazpaylayıcı təsərrüfat və qazpaylayıcı şəbəkənin istifadəyə verilməsi barədə müqavilə imzalayıb. Bu şəbəkələr Gürcüstanın Kaxeti, Msxeta-Mtianeti, Şido və Kvemo-Kartli, Acarıstan, Quriya, İmeretiya, Sameqrelo kimi regionlarını əhatə edir. Bu şəbəkələr 24 şirkət tərəfindən istismar olunur.
SOCAR Energy Georgia-dakı mənbə daha əvvəllər demişdi ki, 2009-cu ildə ARDNŞ Gürcüstan bazarına ümumilikdə 302 milyon kubmetr sosial qaz və 140 milyon kubmetrə yaxın kommersiya qazı verib.
Mənbənin sözlərinə görə, ARDNŞ, həmçinin Rusiya istiqamətinə də ixrac əməliyyatını davam etdirir. İxrac həcmi sutkada 3 milyon kubmetr təşkil edir.
"Hazırda Rusiyaya sutkada 3 milyon kubmetr qaz ixrac olunur. Qaz tədarükü il ərzində bir milyard kubmetr qaz hesabı ilə həyata keçirilir", - mənbə deyib.
Azərbaycan qazının Rusiyaya alqı-satqısına dair ortamüddətli müqavilə 14 oktyabr tarixində Bakıda imzalanıb. Müqavilə 2010-2014-cü illəri əhatə edir. Müqaviləyə əsasən, Azərbaycan tərəfi hər il Rusiyaya 500 milyon kubmetrdən az olmayaraq qaz tədarük edəcək. Müqavilədə qaz tədarükünün həcmi göstərilməyib. ARDNŞ bir il əvvəlcədən qarşı tərəfi tədarük edə biləcəyi həcm barədə məlumatlandıracaq.
Azərbaycan qazının Rusiyaya nəqli 2010-cu ilin yanvarından başlanıb.
Bu il Rusiyaya bir milyard kubmetr Azərbaycan qazı ixrac olunacaq. Həmçinin, ARDNŞ və Qazprom 2011-ci ildə Rusiyaya nəql ediləcək qazın həcmi barədə razılığa gəliblər. Növbəti ildə bu göstərici təxminən iki milyard kubmetr təşkil etməlidir.