Azərbaycan, Bakı, 22 iyun /Trend/
Yanvar-may aylarında "Bakı-Tbilisi-Ceyhan" (BTC) ixrac neft kəməri ilə 15,1 milyon ton Azərbaycan nefti nəql olunub. Bu barədə Azərbaycan Dövlət Statistika Komitəsinin məlumatında deyilir. 2009-cu ilin analoji dövründə bu rəqəm 15,2 milyon ton təşkil edib.
Ümumilikdə, 2009-cu ildə BTC ilə 2008-ci ildəki 32,8 milyon tona qarşı 38,2 milyon ton neft nəql olunub.
BTC neft kəmərinin ümumi uzunluğu 1768 km-dir. Bunun 443 km-i Azərbaycan, 249 km-i Gürcüstan, 1076 km-i isə Türkiyə ərazisindən keçir. Boru kəmərinin tikintisi 2003-cü ilin aprelində, onun neftlə doldurulması isə 2005-ci il mayın 18-də başlayıb.
BTC-nin tikintisi 4 milyard dollara başa gəlib. Bu, tikinti işləri, boru kəmərinin doldurulmasına çəkilən xərclərdir. Maliyyə xərcləri və bank faizlərinin ödənilməsi bura daxil deyil. Ümumi maliyyə kreditinin məbləği 2,6 milyard dollar təşkil edir.
BTC-nin səhmdarları - BP (30,1%), AzBTC (25%), Chevron (8,9%), Statoil (8,71%), ТРАО (6,53%), Eni (5%), Total (5%), Itochu (3,4%), Inpex (2,5%), ConocoPhillips (2,50%) və Hess (2,36%).
Yanvar-may aylarında Cənubi Qafqaz qaz kəməri ilə (Bakı-Tbilisi-Ərzurum) 2,2 milyard kubmetr qaz nəql olunub ki, ötən ilin analoji dövründə bu rəqəm 2,5 milyard kubmetr təşkil edib.
2009-cu ildə "Bakı-Tbilisi-Ərzurum" boru kəməri ilə 2008-ci illə müqayisədə (4,7 milyard kubmetr) 5,2 milyard kubmetr qaz nəql olunub.
"Bakı-Tbilisi-Ərzurum" kəmərinin uzunluğu (Cənubi Qafqaz boru kəməri) 700 kilometrdən çoxdur. Xəzər dənizinin Azərbaycan sektorunda "Şahdəniz" qaz-kondensat yatağında hasil olunan qaz kəmər vasitəsilə nəql olunur. Qaz Gürcüstan və Türkiyəyə daşınır.