Azərbaycan, Bakı, 24 iyul /Trend, müxbir E.İsmayılov/
Bu günədək Gürcüstanda fəal iş aparan ARDNŞ (Azərbaycan Dövlət Neft Şirkəti) bu ölkəyə 470 dollar məbləğində investisiya qoyub. Bu barədə şənbə günü hökumətdəki mənbə məlumat verib.
Həmçinin, Gürcüstandakı onlarca qazpaylayıcı şəbəkə ARDNŞ-in idarəçiliyindədir. Bununla yanaşı, şirkət Kulevi neft terminalına sahibdir. Azərbaycan Gürcüstan ərazisindən "Bakı-Tbilisi-Ceyhan" neft kəməri və "Bakı-Tbilisi-Ərzurum" qaz kəmərləri vasitəsilə öz neft və qazını ixrac edir.
Eləcə də şirkət Gürcüstanda neft məhsullarının pərakəndə satış bazarında fəaliyyətini fəal inkişaf etdirib. İndi ölkənin müxtəlif regionlarında SOCAR brendi altında 37 yanacaqdoldurma stansiyası fəaliyyət göstərir.
Mənbənin dediyi kimi, bu ilin sonunadək ARDNŞ Gürcüstanda daha 23 yanacaqdoldurma stansiyası açmaqla, onların ümumi sayını 60-a çatdırmağı planlaşdırır.
ARDNŞ-in Gürcüstandakı maraqlarını onun "SOCAR Energy Georgia" törəmə şirkəti təmsil edir. Bu şirkətin həmtəsisçiləri: ARDNŞ - 51 faiz, "Petro-Trans FZCO" - 24,5 faiz və İvan Çxartişvili - 24,5 faiz.
