Azərbaycan, Bakı, 10 avqust /Trend, müxbir E.İsmayılov/
"Bakı-Tbilisi-Ceyhan" (BTC) ixrac neft kəməri vasitəsilə yanvar-iyun aylarında 18 milyon tona (36 milyon barel) yaxın neft nəql edilib. Bu barədə "bp-Azerbaijan" şirkətinin hesabatında deyilir.
Birinci rübdə BTC çərçivəsində əsaslı xərclər 13,4 milyon dollar təşkil edib. Proqnozlara görə, bu il BTC üzrə əsaslı xərclər 69 milyon dollar təşkil etməlidir.
Hesabatda deyildiyi kimi, boru kəməri ilə Azərbaycanın "Azəri-Çıraq-Günəşli" dəniz yataqlarından və "Şahdəniz" qaz-kondensat yatağından hasil olunan neft nəql edilir. Eləcə də BTC ilə neft nəqli üzrə saziş imzalanmasından sonra, "Dragon oil" şirkətinin hasil etdiyi türkmən nefti də BTC ilə nəql olunur. Qazaxıstanın "Tengiz" yatağından neftin nəqlinə dair saziş də mövcuddur.
2009-cu ildə BTC ilə 38 milyon tona yaxın (285 milyon barel) neft nəql olunib. 2009-cu ildə BTC üzrə əsaslı xərclər 92 milyon dollar təşkil edib.
Bu boru kəməri ilə "Azəri-Çıraq-Günəşli" yataqlarından və bp-nin operatoru olduğu "Şahdəniz" qaz kondensatı yatağından neft nəql olunur.
"BTC Co"nun səhmdarları aşağıdakılardır: bp (30,1 faiz); AzBTC (25 faiz); "Chevron" (8,90 faiz); "Statoil" (8,71 faiz); ТРАО (6,53 faiz); "Eni" (5 faiz ); "Total" (5 faiz); "İtochu" (3,40 faiz ); "Inpex" (2,50 faiz); "ConocoPhillips" (2,50 faiz) və "Amerada Hess" (2,36 faiz).
Qərb marşrutu ixrac boru kəməri ilə (Bakı-Supsa) Qara dənizdəki Supsa terminalına yanvar-mart aylarında 8 milyon barel neft nəql olunub. Birinci rübdə dəmiryolla 2 milyon barel neft ixrac olunub.
