Azərbaycan, Bakı, 20 avqust /Trend, müxbir E.İsmayılov/
"Chirag oil project" çərçivəsində ("Azəri-Çıraq-Günəşli" yataqları blokunda hasilatın artırılması) platforma üçün dayaq blokunun (topside), eləcə də qazma obyektlərinin tikintisi prosesi 2,5 il vaxt aparacaq. Bu barədə cümə günü neft-qaz bazarındakı mənbə bildirib.
Onun sözlərinə görə, dayaq blokunun tikintisi üzrə işlərə artıq başlanılıb. Tikinti "Amec-Tekfen-Azfen (ATA)" şirkətlər alyansının Bakı yaxınlığında yerləşən tikinti meydançasında həyata keçirilir.
Azərbaycan Beynəlxalq Əməliyyat Şirkəti ilə (ABƏŞ) bağlanmış müqaviləyə görə, AMЕK/Tekfen/Azfen (ATA) konsorsiumu dayaq modullarının, eləcə də qazma obyektlərinin tikintisini, onların yığılması, sazlanması və istismar sınaqlarını həyata keçirir. Bu layihənin dəyəri 340 milyon dollara yaxındır.
"Tikinti prosesinə artıq başlanılıb, indi dayaq blokunun tikilməsi üçün ilk polad layların istehsalına başlanılıb. Onlar hazır olduqdan sonra, quraşdırma işlərinə başlanacaq", - mənbə deyib.
Onun sözlərinə görə, tikinti prosesi iki mərhələdən ibarətdir. Birinci mərhələ zəruri elementlərin istehsal prosesi, ikincisi isə onların quraşdırılmasıdır. "Zəruri elementlər mərhələli şəkildə hazırlanacaq, bundan sonra isə onların mərhələli quraşdırılması həyata keçiriləcək", - mənbə qeyd edib.
ATA artıq "Azəri-Çıraq-Günəşli" yataqlarının işlənməsi layihəsi çərçivəsində texnoloji platformalardan birinin dayaq blokunun tikilməsi ilə məşğul olub.
Layihə yeni "Qərbi Çıraq" platformasının inşasını nəzərdə tutur. Platforma dənizin 170 metr dərinliyində artıq fəaliyyət göstərən "Çıraq" və "Günəşli" hasilat platformalarının arasında quraşdırılacaq. "Chirag oil project" çərçivəsində inşaat işlərinin əksəriyyəti, o cümlədən, platformanın qazma modulunun inşası Azərbaycanda həyata keçiriləcək. Əvvəlki layihələr üçün modul xaricdə inşa edilib.
"Chirag oil project" altı milyard dollar məbləğində sərmayəni nəzərdə tutur.
"Azəri-Çıraq-Günəşli"də neft hasilatının artırılması çərçivəsində tikiləcək yeni platformadan "Azeri Light" növlü neftin hasilatının sutkalıq həcminin 183 min barel təşkil edəcəyi planlaşdırılıb. Yeni platformadan sutkada 6,5 milyon kubmetr qazın hasil ediləcəyi gözlənilir. Platformada sutkalıq qaz vurulmasının həcminin, təxminən, 2,3 milyon kubmetr olacağı nəzərdə tutulub.
Layihə çərçivəsində qabaqlayıcı qazma işləri 2010-cu ilin ikinci, 2012-ci ilin birinci dövrünü əhatə edəcək. Qazma işləri "Dədə Qorqud" qurğusundan həyata keçiriləcək. Platformadan hasilat 2013-cü ilin sonuna planlaşdırılıb.
Layihənin realizəsi çərçivəsində (AÇG üzrə müqavilənin 2024-cü ilədək qüvvədəolma müddəti) ümumilikdə 300 milyon barel neftin hasil edilməsi planlaşdırılıb.
"Azəri-Çıraq-Günəşli" layihəsinin iştirakçıları aşağıdakılardır: bp (operator - 37,43 faiz iştirak payı), "ChevronTexaco" (11,27 faiz), ARDNŞ (10 faiz), INPEX (10,96 faiz), "Statoyl" (8,56 faiz), "ExxonMobil" (8,006 faiz), TPAO (6,75 faiz), "Itochu" (4,3 faiz), "Delta Hess" (2,72 faiz).