Azərbaycan, Bakı, 24 avqust /Trend, müxbir S.Süleymanov/
"Tethys Petroleum Limited" konserninin idarə heyətinin sədri, baş icraçı direktor Devid Robson bildirib ki, konsern Qazaxıstanın neft-qaz sektoruna investisiyaların həcmini 300 milyon dollaradək artırmaq niyyətindədir. Bu barədə Qazaxıstan XİN mətbuat xidmətinin rəhbəri İlyas Ömərov məlumat verib.
Devid Robson Qazaxıstan diplomatını Mərkəzi Asiya ölkələrində neft və qaz ehtiyatlarının kəşf edilmiş potensialı haqqında məlumatlandırıb. "Onun fikrincə, onların karbohidrogen yataqlarının inkişafı üçün əhəmiyyətli perspektivi var", - Ömərov bildirib.
Ömərov deyib ki, "Tethys Petroleum Limited" Qazaxıstan iqtisadiyyatına 100 milyon dollara yaxın vəsait yatırıb, yaxın vaxtlarda isə investisiya layihələrinin göstəricisinin 300 milyon dollaradək artırılması gözlənilir.
Konsernin məlumatına görə, bu günlərdə Qazaxıstan Neft və Qaz Nazirliyi "Tethys Petroleum Limited"ə Kul-Bas sahəsində kəşfiyyatın aparılması müddətini iki il uzatmasına icazə verib.
Müddət 2013-cü il noyabrın 11-dək uzadılıb. Sazişə müvafiq dəyişikliklər ediləcək.
Rəsmi məlumatlara görə, hazırda sahəsi 7632 kvadratkilometr təşkil edən Kul-Basın müqavilə ərazisi Akkulkov müqavilə ərazisini əhatə edir. Orada şirkət bu yaxınlarda АКD01 ("Doris") quyusunda neft aşkar edib və hazırda bu neft yatağının qiymətləndirilməsi, eləcə də yaxınlıqdakı ərazilərdə neft kəşfiyyatı üzrə iş aparılır.
Müqavilənin ilkin şərtləri müqavilə ərazisinin sonradan qaytarılması şərti ilə kəşfiyyatın altıillik dövrünü və hasilatın 19 il müddətinə sonradan uzadılma imkanını nəzərdə tutub.
Bu "Tethys"in cari ildə müqavilə müddətinin uzadılması ilə bağlı aldığı ikinci icazədir. Məlumat verildiyi kimi, ilk müqavilənin uzadılması iyunda Akkulkov sahəsində kəşfiyyatın aparılması ilə bağlı olub.
Mərkəzi Asiyada neft və qaz yataqlarının işlənməsində ixtisaslaşan "Tethys" Qazaxıstan, Tacikistan və Özbəkistanda işləyir.
"Tethys" hazırda Qazaxıstanda fəaliyyətini "Tethys Services Kazakhstan" MMC, "BN-Мunay" MMC, "Кul-Bas" MMC və "ТetisМunayQaz" MMC törəmə şirkətləri vasitəsilə həyata keçirir.
