Azərbaycan, Bakı, 6 dekabr /Trend, müxbir А.Axundov/
Suriya 2011-ci ildə Azərbaycandan qaz idxalına başlaya bilər, lakin dəqiq tarix hələ müəyyən olunmayıb. Bu barədə Trend-ə Suriyanın neft nazirinin müavini Həsən Zeynəb deyib.
"Dəqiq tarix hələ müəyyən olunmayıb. Mövcud məsələ üzrə heç bir problem yoxdur, biz yalnız Türkiyə və Suriya arasında qaz kəmərinin qalan hissəsinin tikintisinin başa çatmasını gözləyirik. Lakin işlərin yaxın günlərdə başa çatması haqqında bizdə məlumat yoxdur", - Zeynəb bildirib.
Ötən ilin iyulunda Suriya Prezidenti Bəşşar əl-Əsədin Azərbaycana səfəri zamanı tərəflər bir milyard kubmetr qazın nəqli barədə razılığa gəliblər.
Zeynəbin sözlərinə görə, idxal olunan qazın həcmi sutkada 2-3 milyon kubmetr təşkil edəcək.
Türkiyə və Suriya Hələb (Suriya) və Kilis (Türkiyə) arasında 63 kilometrlik qaz kəmərinin inşasını həyata keçirir.
ABŞ Dövlət Enerji İnformasiya İdarəsinin (EIA) məlumatına əsasən, Suriyanın aşkar olunmuş qaz ehtiyatları 2009-cu ildə doqquz trilyon kubfut təşkil edib.
2004-2008-ci illərdə Suriyada qaz hasilatı azalıb, lakin yeni layihələr hazırlandığından hasilatın tezliklə genişlənməsi gözlənilir.
2009-cu ildə Suriyada qaz hasilatı 219 milyard kubfut, tələbat isə 251 milyard kubfut təşkil edib.
2008-ci ildə ölkədə qaz hasilatı 208 milyard kubfut, idxal beş milyard, tələbat isə 213 milyard kubfut təşkil edib.