Azərbaycan, Bakı, 16 dekabr /Trend, müxbir E.İsmayılov/
İtaliyanın "Saipem" servis şirkəti 2011-2014-cü illər üçün 700 milyon dollar məbləğində yeni müqavilələr əldə edib. Bu barədə şirkətin rəsmi internet saytında dərc edilən məlumatda deyilir.
Yeni müqavilələr Meksika körfəzində, Qazaxıstanda, eləcə də Şimal dənizində və Azərbaycanda aparılacaq əməliyyatları əhatə edəcək. Yeni müqavilələr mövcud ofşor müqavilələr çərçivəsində işlərin həcminin artırılmasını da nəzərdə tutur.
"Saipem" şirkəti İtaliyanın "Eni" neft şirkətinin törəmə şirkətidir.
Azərbaycanda "Eni" şirkəti Xəzərin Azərbaycan sektorundakı "Azəri-Çıraq-Günəşli" yataqlar blokunda hasil edilən neftin nəql edildiyi Bakı-Tbilisi-Ceyhan neft boru kəmərinin səhmdarlarından biridir.
BTC neft kəmərinin ümumi uzunluğu 1768 kilometrdir ki, bunun da 443 km-i Azərbaycan, 249 km-i Gürcüstan, 1076 km-i isə Türkiyə ərazisində yerləşir. Boru kəmərinin tikintisinə 2003-cü ilin aprel ayında, onun neftlə doldurulmasına isə 2005-ci il mayın 18-də başlanılıb.
BTC-nin səhmdarları BP (30,1 faiz), AzBTC (25 faiz), "Chevron" ( 8,90 faiz), "Statoil" (8,71 faiz), TPAO (6, 53 faiz), "Eni" (5 faiz), "Total" (5 faiz), "Itochu" (3,40 faiz), "Inpex" (2,50 faiz), "ConocoPhilips" (2,50 faiz) və "Hess" (2,36 faiz) şirkətləridir.
