Azərbaycan, Bakı, 7 yanvar /Trend, müxbir A.Axundov/
Türkiyə və Gürcüstan arasında bu ölkələrin və Azərbaycanın enerji sistemlərinin sinxronlaşdırılmasına imkan verəcək 500 meqavatlıq elektrik ötürücüsü xəttinin (EÖX) çəkilməsi ilə bağlı danışıqlar davam edir. Bu barədə Trend-ə Türkiyənin Elektrik Enerjisinin satışı üzrə Dövlət Şirkətinin (TETAŞ) idarə heyətinin sədri və baş direktoru Hacı Duran Gökkaya məlumat verib.
"Bu layihənin həyata keçirilməsi Türkiyəyə Gürcüstandan və Azərbaycandan elektrik enerjisi nəql etməyə imkan verəcək", - Gökkaya bildirib.
Onun sözlərinə görə, işlərin 2012-ci ildə başa çatdırılması planlaşdırılır.
Gökkayanın sözlərinə görə, Türkiyənin elektrik enerjisi sektorunun liberallaşdırılması və özəlləşdirilməsi ilə əlaqədar bu layihələrlə özəl sektor məşğul olacaq.
Bir müddət əvvəl "Azərenerji" SC-nin (Azərbaycanda elektrik enerjisinin istehsalı və paylanması) rəhbəri Etibar Pirverdiyev bildirib ki, 2011-ci ilin sonunadək SC Mingəçevirdən Azərbaycanın Gürcüstanla sərhəddinədək yüksəkgərginlikli elektrik xətlərinin yenidənqurulmasını başa çatdıracaq. Bu istiqamətdə işlərin aparılması Azərbaycan-Gürcüstan-Türkiyə enerji körpüsü layihəsi çərçivəsində nəzərdə tutulub.
Onun sözlərinə görə, artıq 2012-ci ilin mayından Azərbaycandan Gürcüstan və Türkiyə istiqamətində elektrik enerjisinin ixracının texniki mümkünlüyü yaranıb.
Bir müddət əvvəl Gürcüstanın energetika naziri bildirib ki, gürcü tərəfi artıq yüksəkgərginlikli elektrik xətlərinin tikintisinə başlayıb. Azərbaycanla sərhəddədək yüksəkgərginlikli elektrik xətlərinin tikintisi gələn ilin sonunadək, Türkiyə ilə isə 2012-ci ilin birinci yarısınadək başa çatacaq.
Ötən il Azərbaycan-Gürcüstan-Türkiyə enerji körpüsü layihəsinə dəstək çərçivəsində "Azərenereji", "Gürcüstan dövlət enerji sistemi" şirkətləri və Türkiyənin Elektrik Enerjisinin Transmissiyası Korporasiyası qarşılıqlı anlaşma memorandumu imzalayıblar. Azərbaycan, Gürcüstan və Türkiyənin birgə həyata keçirdiyi "Enerji körpüsü" (Power Bridge) layihəsini ABŞ-ın Beynəlxalq İnkişaf Agentliyi (USAID) maliyyələşdirir.
USAID və ABŞ-ın Enerji Assosiasiyası birgə maliyyə və texniki yardımı həyata keçirirlər. Onlar "Azərenereji", "Gürcüstan dövlət enerji sistemi" şirkətləri və Türkiyənin Elektrik Enerjisinin Transmissiyası Korporasiyası ilə birgə yüksək gərginlikli regional şəbəkə modelini hazırlayırlar.
İşçi qrup hər üç ölkədə yüksəkgərginlikli şəbəkələrin işini təhlil edəcək və regional perspektivlər planında sərmayələrin eyniləşdirilməsini həyata keçirəcək ki, bu da elektrik enerjisi şəbəkələrinin gücünü və mübadiləsini, satışını yaxşılaşdırmağa imkan verəcək. Bu, bütün sistemin təhlükəsizliyini optimallaşdıracaq.