Azərbaycan, Bakı, 21 yanvar /Trend, müxbir E.İsmayılov/
Ukraynada SOCAR brendi ilə fəaliyyət göstərəcək yanacaqdoldurma məntəqələrinin sayı beş il ərzində 500-ə çatacaq. Bu barədə cümə günü ARDNŞ-nin (Azərbaycan Respublikası Dövlət Neft Şirkəti) Ukraynadakı nümayəndəliyindən məlumat verilib.
"Bu ilin sonuna qədər stansiyaların sayı 50-yə, beş il ərzində isə 500-ə çatacaq", - mənbə bildirib.
Onun sözlərinə görə, hazırda Ukraynada ARDNŞ-nin brendi altında 7 yanacaqdoldurma məntəqəsi fəaliyyət göstərir.
Bu günlərdə Ukraynada ARDNŞ-nin beş yanacaqdoldurma məntəqəsi istismara verilib. Onların hamısı Odessa-Nikolayev-Yujnoukrainsk avtomobil magistralı boyunca yerləşir.
ARDNŞ-nin Gürcüstanda 60-dan çox yanacaqdoldurma məntəqəsi var və Azərbaycanda stansiya şəbəkələrinin yaradılmasına başlayıb. Həmçinin şirkət Rumıniyanın neft məhsullarının pərakəndə satış bazarına çıxmaq barədə planlarını elan edib ki, bu da Aİ bazarına çıxış deməkdir.
