Azərbaycan, Bakı, 2 mart /Trend/
2011-ci ilin fevral ayında ARDNŞ-nin Kulevi neft terminalı pis hava şəraiti səbəbindən maye yüklərin yüklənməsinin ümumi həcmini yanvar ayına nisbətən 27 faiz azaldıb. Bu barədə çərşənbə günü terminaldan məlumat verilib.
Fevralda terminal 302,4 min ton maye yük qəbul edib, 244,5 min ton neft və neft məhsulları yola salıb.
2011-ci ilin yanvarında Kulevi neft terminalı 333,4 min ton maye neft yükləri daşıyıb ki, bu da 2010-cu ilin yanvar ayının göstəricisindən 31 faiz çoxdur. Yanvarda terminal 362,7 min ton neft və neft məhsulları qəbul edib.
Kulevi terminalı 2008-ci ilin mayında istismara verilib. Neft məhsullarının faktiki olaraq boşaldılmasına iyundan başlanılıb. Terminalda yüklərin yüklənib-boşaldılmasının ümumi gücü ildə 10 milyon ton neft yüküdür. Bura üç milyon ton neft, üç milyon ton dizel yanacağı, dörd milyon ton mazut daxildir. Rezervuar parkının ümumi tutumu 320 min kubmetr təşkil edir və 380 min kubmetrədək artırılması mümkündür.
Neft əməliyyatları üçün terminalda neft məhsullarının 100 min tonadək yükgötürmə qabiliyyətinə malik tankerə doldurulması üçün iki yanalma körpüsünün tikintisi nəzərdə tutulub. Məhsuldarlıq saatda 1000-dən 8000 kubmetrədək neft doldurulması təşkil edir. Müəssisədə liman, dəmiryol stansiyası da var ki, burada eyni vaxtda yükün boşaldılmasını gözləyən 180 vaqon-sistern yerləşdirmək mümkündür. Dəmiryol estakadalarında eyni vaxtda 168 vaqon-sisternin boşaldılması mümkündür.
