Azərbaycan, Bakı, 6 aprel /Trend, müxbir E.İsmayılov/
Bu ilin ortalarında ARDNŞ Azərbaycanda neft və qaz hasilatının həcmi ilə bağlı proqnozlara yenidən baxmaq niyyətindədir. Trend-in məlumatına görə, bu barədə çərşənbə günü ARDNŞ rəhbəri Rövnəq Abdullayev deyib.
Onun sözlərinə görə, hazırda proqnozlaşdırılır ki, 2011-ci ildə Azərbaycanda neft və qaz hasilatının həcmi ötən ilin səviyyəsində qalacaq.
"Biz ötənilki hasilat həcmini gözləyirik, lakin bu, cari ilin ortalarında dəqiqləşdiriləcək", - Abdullayev qeyd edib.
2010-cu ildə Azərbaycanda 50,83 milyon ton neft və kondensat hasil olunub ki, bu da 2009-cu ilin göstəricisindən 0,9 faiz çoxdur. Ötən il hasil olunan neftin əsas həcmi qeyri-dövlət sektorunun, eləcə də Azərbaycan Beynəlxalq Əməliyyat Şirkətinin və "Şahdəniz" konsorsiumunun payına düşür. Onlar "Azəri-Çıraq-Günəşli" dəniz yataqlar blokundan və "Şahdəniz" qaz-kondensat yatağından 43,61 milyon ton neft və qaz-kondensat hasil ediblər ki, bu da 2009-cu ilin göstəricisindən 1,1 faiz çoxdur.
2010-cu ildə Azərbaycanda qaz hasilatı 26,23 milyard kubmetr təşkil edib ki, bu da 2009-cu ildə olduğundan 11,2 faiz çoxdur. Respublikada hasil olunan qazın ümumi həcmindən əmtəə qazının payına 16,67 milyard kubmetr düşüb ki, bu da 2009-cu ildəkindən 2,1 faiz çoxdur. 6,3 milyard kubmetrdən artıq əmtəə qazı dövlət sektorunun payına düşür, 10,33 milyard kubmetrə yaxın qaz isə xarici şirkətlərlə birgə hasil olunub.
