Azərbaycan, Bakı, 3 sentyabr /Trend, müxbir E.İsmayılov/
ARDNŞ (Azərbaycan Respublikası Dövlət Neft Şirkəti) "Günəşli" (dayaz hissə) və "Neft Daşları" yataqlarında lay sularının toplanması, təmizlənməsi və utilizasiyası üzrə sistemin təşkili prosesini başa çatdırır. Trend-in məlumatına görə, bu barədə şənbə günü ARDNŞ-nin yaydığı məlumatda deyilir.
"Layihə çərçivəsində həyata keçirilən tikinti-quraşdırma işləri artıq başa çatdırılıb. Layihə çərçivəsində əsasən lay sularının tam qapalı formada idarə olunması və onların yenidən laylara vurulmasını nəzərdə tutan sistemin yaradılması nəzərdə tutulur", - məlumatda bildirilir.
Sistemin yaradılması üzrə işlər "Günəşli-4" platformasında aparılır.
Həmçinin "Günəşli" yatağında lay təzyiqinin sabit səviyyəsinin saxlanması üçün "Günəşli-4" platformasında qaz-lift sisteminin yerləşdirilməsi məqsədilə onun genişləndirilməsi işləri görülür.
Hazırda platformada gücü sutkada dörd milyon kubmetr qaz olan kompressor stansiyasında sınaq-sazlama işləri aparılır. Stansiyanın istismara verilməsindən sonra yataqda yaranan aşağı təzyiqli qazın tam toplanması mümkün olacaq ki, nəticədə onun atmosferə atılmasının qarşısı alınacaq.
Atmosferə atılan səmt qazlarının həcmi ildə 150-250 milyon kubmetr arasında dəyişir.