...

"Şahdəniz" konsorsiumu boru kəməri layihəsi barədə təklifləri nəzərdən keçirir

Energetika Materials 5 Oktyabr 2011 14:18

Trend-i buradan izləyin

Azərbaycan, Bakı, 5 oktyabr /Trend, müxbir E.İsmayılov/

Xəzər dənizinin Azərbaycan sektorundakı "Şahdəniz" qaz-kondensat yatağının işlənməsi üzrə konsorsiumun ekspertləri Azərbaycan qazının Avropaya nəqlinə istiqamətlənmiş hər üç boru kəməri layihəsinin təkliflərinə baxmağa başlayıblar. Bu barədə çərşənbə günü jurnalistlərə ARDNŞ (Azərbaycan Dövlət Neft Şirkəti) prezidenti Rövnəq Abdullayev bildirib.

Oktyabırın 1-də "Nabukko", ITGI və TAP boru kəməri layihələri təkliflərini yatağın işlənməsi ilə məşğul olan konsorsiuma təqdim ediblər.

"Ekspertlər 15-20 gün ərzində işləri başa çatdıra və nəticələri təqdim edə bilərlər", - Abdullayev deyib.

Azərbaycan tərəfi seçiləcək layihə vasitəsilə "Şahdəniz"in ikinci fazası çərçivəsində Avropaya ildə 10 milyard kubmetr qaz tədarük etmək niyyətindədir.

Məlumata əsasən, konsorsium təqdim edilmiş təkliflərə daha əvvəl elan edilmiş bir sıra meyarlara uyğun şəkildə baxacaq. Onlara kommersiya cəlbediciliyi, texniki və maliyyə nöqteyi-nəzərindən layihənin həyata keçirilməsi imkanları, mühəndis-layihələndirmə işləri, səmərəli istismar, fəaliyyətin əlaqələndirilməsi və şəffaflıq, mərhələli genişləndirmə imkanları və digərləri daxildir.

"Şahdəniz" yatağının ehtiyatları 1,2 trilyon kubmetr qaz həcmində qiymətləndirilir.

"Şahdəniz" yatağı üzrə müqavilə 1996-cı il iyunun 4-də imzalanıb. Müqavilə iştirakçıları bunlardır: BP (operator) - 25,5%, "Statoil" - 25,5%, NICO - 10%, "Total" - 10%, "LUKoil" - 10%, TPAO - 9%, ARDNŞ - 10%.

Hazırda Gürcüstana və Türkiyəyə qaz Cənubi Qafqaz qaz kəməri ilə nəql olunur.

Avropa energetika sahəsində, o cümlədən "Cənub qaz dəhlizi" çərçivəsində Azərbaycanla əməkdaşlıqda maraqlıdır.

"Cənub dəhlizi" layihəsi Avropa İttifaqı üçün prioritet enerji layihələrindən biridir. O, enerji tədarükünün mənbə və marştutlarını diversifikasiya edəcək və bununla da Aİ-nin enerji təhlükəsizliyini artıracaq. "Cənub dəhlizi" layihəsinə aiddir: "Nabukko" qaz kəməri, Transadriatik qaz kəməri (TAP), "Ağ axın", ITGI (Türkiyə-Yunanıstan-İtaliya qaz kəməri).

Xəbər lenti

Xəbər lenti