...

İran "Qazprom"u uzaqlaşdıraraq, "Azər" yatağının inkişafı üçün daxili şirkətləri cəlb edir

Energetika Materials 11 Oktyabr 2011 16:15 (UTC +04:00)

Azərbaycan, Bakı, 11 oktyabr /Trend, müxbir T.Cəfərov/

"Azər" neft yatağının inkişafı layihəsinin "Qazprom" şirkəti tərəfindən icrasındakı kecikməni nəzərə alaraq, İran Milli Neft Şirkəti bu gün İranın daxili şirkətlərindən ibarət konsorsiumla yatağın inkişaf etdirilməsi üzrə müqavilə imzalayacaq. Trend-in məlumatına görə, bu barədə "Mehr" informasiya agentliyi İranın Neft Nazirliyinə istiinadən xəbər verir.

Məlumata əsasən, imzalanacaq müqavilənin dəyəri iki milyard dollar təşkil edır.

Bundan əvvəl İranın "Neft Sektorunun İnkişafı və Mühəndisliyi" şirkətinin direktoru Naci Səduni "Qazprom"un "Azər" yatağının inkişafı layihəsini çox təxirə saldığını və İran tərəfinin həmin yatağın inkişaf etdirilməsi üçün "Qazprom"u gözləməyəcəyini demişdi.

"Azər" neft yatağı İranın Elam əyalətində İraqla sərhəddə yerləşir və bu iki ölkə həmin yataqdan müştərək neft hasil edirlər. İraqda həmin neft yatağı "Bədra" adi ilə tanınır. Yataqda 2,5 milyard barel xam neft ehtiyatı mövcuddur. İran "Azər" yatağını tam şəkildə inkişaf etdirməklə sutkada 50-65 min barel xam neft istehsal etmək niyyətindədir.

İranın Neft Nazirliyi və Rusiyanın "Qazprom" şirkəti arasında "Azər" neft yatağının inkişafı üzrə qarşılıqlı anlaşma haqqında memorandum 2009-cu ildə imzalanmışdı.

2008-ci ildə "Statoil" şirkəti "Azər" və "Çanqula" neft yataqlarında inkişaf proqramını dayandırdıqdan sonra PEDEC İran mütəxəssislərinin köməyi ilə bu yataqlardakı işlərə başlayıb.

Hesablamalara görə, "Azər" yatağından hasil ediləcək neftin ümumi həcmi 400 milyon barelə yaxın olacaq (İraqdakı "Bədra" neft yatağı ilə birgə). Proqnozlara görə, "Azər" neft yatağının inkişafı üzrə işlər başa çatdıqdan sonra bu yataqdan sutkada 50-65 min barel yüngül neft hasil ediləcək (25 il ərzində).

İranın "Mehr" xəbər agentliyi Rusiyanın "Qazprom" şirkətinin "Azər" yatağının inkişafı layihəsini təxirə salmasına səbəb kimi, "Qazprom"un Türkiyə və Koreya Respublikasından olan konsorsiumun tərkibində 2009-cu ildə İraqın Neft Nazirliyi ilə "Bədra" yatağından neft hasilatı üçün imzaladığı müqaviləni göstərib.

Xəbər lenti

Xəbər lenti