Azərbaycan, Bakı, 17 yanvar /Trend, müxbir E.İsmayılov/
ARDNŞ-nin (Azərbaycan Respublikasının Dövlət Neft Şirkəti) 6 min işçisi kooperativ mənzillə təmin ediləcək. Bu barədə çərşənbə axşamı jurnalistlərə ARDNŞ prezidenti Rövnəq Abdullayev deyib.
Onun sözlərinə görə, əvvəllər ARDNŞ neftçiləri üçün yaşayış mənzillərinin tikintisi çərçivəsində onlarla hektar torpaq sahəsi alınıb.
"Bununla bağlı artıq Nazirlər Kabinetinin qərarı var. Bu ərazidə kooperativ tikinti aparılacaq, növbədə dayanan 6 minə qədər işçinin mənzillə təmin edilməsi üçün şərait yaradılacaq", - Abdullayev bildirib.
Onun sözlərinə görə, ARDNŞ-nin işçilərin kooperativ mənzillə təminatına keçidi ötən il başlayıb.
"Artıq mənzillərin pulsuz verilməsi imkanı yoxdur. Bu təcrübə SSRİ dövründə olub və biz onu qorumağa çalışdıq. Beynəlxalq şirkət olmaqla, biz kooperativ mənzillərin tikintisinə keçdik", - Abdullayev deyib.
O vurğulayıb ki, mənzilin qiymətinin bir hissəsi işçilərin əməkhaqları, digər hissəsi isə ARDNŞ-nin vəsaitləri hesabına ödənilir.
Əvvəllər ARDNŞ-dəki mənbənin Trend-ə verdiyi məlumata görə, işçinin növbədə dayanma müddəti və digər şərtlərdən asılı olmayaraq, ARDNŞ mənzilin ümumi qiymətinin 70 faizinə qədərini ödəyə bilər.
