Azərbaycan, Bakı, 10 iyul /Trend, müxbir E.İsmayılov/
Azərbaycan Respublikası Dövlət Neft Şirkəti (ARDNŞ) "Neft daşları" dəniz yatağında 106 yeni quyu qazmaq niyyətindədir. Trend-in məlumatına görə, bu barədə çərşənbə günü jurnalistlərə ARDNŞ prezidenti Rövnəq Abdullayev deyib.
Onun sözlərinə görə, bu işlərin ARDNŞ-nin sərbəst işlədiyi yataqlardan neft hasilatının həcminin artırılması proqramı çərçivəsində görülməsi planlaşdırılır.
ARDNŞ prezidenti bildirib: "Əfsanəvi "Neft daşları" yatağında neft hasilatının həcmini artırmaq məqsədilə yaxın 2-3 il ərzində 106 quyu qazmaq planlaşdırılır. Yeni quyuların qazılması üzrə işləri həyata keçirmək üçün fasiləsiz elektrik enerjisi təchizatını təmin etmək lazımdır ki, bu da yeni 45 meqavatlıq qaz turbinli istilik elektrik stansiyasının tikintisi və istismara verilməsi yolu ilə mümkün olub".
