Azərbaycan, Bakı, 13 avqust /Trend, müxbir E. İsmayılov/
"Şahdəniz" qaz-kondensat yatağının işlənməsinin ikinci mərhələsi çərçivəsində qazma, qabaqlayıcı qazma işlərini 2022-ci ilədək davam etmək planlaşdırılır. Trend-in məlumatına görə, "Şahdəniz" yatağının işlənməsi üzrə ikinci mərhələsi layihəsi üzrə ətraf mühitin və sosial sahəyə təsirin qiymətləndirilməsi haqqında hesabatın ictimai dinləmələri zamanı hesabatın hazırlanması üzrə işçi qrupun rəhbəri Bil Bulton bildirib.
Dinləmələr zamanı bildirilib ki, 2014-cü ildən 2022-ci ilədək qazma işləri "Heydər Əliyev" və "İstiqlal" adını daşıyan üzən qazma qurğular vasitəsilə həyata keçiriləcək.
Dinləmələr zamanı vurğulanıb ki, xüsusilə daxili bloklar, üst tikililər və körpünün tikintisi daxil olmaqla platformaların tikintisi prosesi 2017-ci ilin birinci yarısında başa çatacaq.
Qazma işlərinin 5 klasster vasitəsilə həyata keçirilməsi planlaşdırılır və bütün proses 2022-ci ildə yekunlaşacaq. İlk qazın artıq 2018-ci ildə hasil ediləcəyi planlaşdırılır.