Bakı. Trend:
2022-ci ildə Yunanıstanın Azərbaycan qazının satın alınmasına çəkdiyi xərc ümumilikdə 1 962 325 800 avro təşkil edib.
Bu barədə Trend-ə Avropa İttifaqının statistika idarəsi olan "Eurostat"dan bildiriblər.
"Eurostat"ın məlumatına görə, ötən il Yunanıstan Azərbaycandan 1 710 615 989 kubmetr qaz idxal edib.
2022-ci ildə Aİ ölkələrinin Azərbaycan qazının idxalına çəkdikləri ümumi xərc 15 598 852 881 avro, tədarüklərin həcmi isə 11 941 237 690 kubmetr olub.
Qeyd edək ki, 2022-ci ilin yekunlarına görə, ölkədə qaz hasilatı 46,7 milyard kubmetr təşkil edib. Bu göstərici 2021-ci illə müqayisədə 6,5 faiz və ya 2,5 milyard kubmetr artıb. Beləliklə, "Azəri-Çıraq-Günəşli" yatağından 13,4 milyard kubmetr, "Şahdəniz" yatağından isə 25,2 milyard kubmetr qaz hasil edilib. Azərbaycan Dövlət Neft Şirkəti (SOCAR) tərəfindən isə 8,1 milyard kubmetr qaz hasil olunub.
2022-ci il ərzində hasil edilən Azərbaycan qazının ümumi həcminin 22,3 milyard kubmetr ixrac olunub ki, bu da 2021-ci ilin göstəricisindən 18 faiz yüksəkdir.
Qeyd edək ki, Azərbaycan Avropaya təbii qazı Cənub Qaz Dəhlizinin bir hissəsi olan Trans-Adriatik boru kəməri (TAP) ilə nəql edir. TAP-ın ilkin buraxılış qabiliyyəti illik 10 milyard kubmetr olmaqla, 20 milyard kubmetrədək artırılması mümkündür.
Twitter: @Lyaman_Zeyn