Türkiyədə BP şirkəti 3534 dərinsulu kəşfiyyat blokunun kəşfiyyatı üzrə operatordur və şirkət burada 25% birbaşa iştirak payına malikdir. Yanvar ayında BP öz tərəfdaşları TRAO (50%) və Unocal (Turkey B.I. - 25%) ilə bu lisenziya blokunda Hopa HPX-1 birinci kəşfiyyat quyusunda qazıntı işlərini başa çatdırıb. Hopa HPX-1 quyusunda qazma işlərinə 2005-ci il iyulun 18-də başlanılıb və o, planda nəzərdə tutlduğu kimi təxminən 4700 metr ümumi dərinliyə çatıb. Bundan sonrakı bir neçə ay ərzində tərəfdaşlar bu quyunun qazılmasının nəticələrini öyrənəcəklər.
Trend in verdiyi məlumata görə, BP Azerbaijan şirkətinin prezidenti Devid Vudvord quyunun qazıntısı zamanı şirkət süxurlar, təzyiq və digərləri ilə bağlı çox mühüm məlumatlar əldə edib. Hazırda bu nəticələrin analizi aparılır və bu müqavilənin gələcək taleyi məhz onların yekunlarından asılıdır. D.Vudvordun sözlərinə görə, şirkətlər Qara dənizin bu hissəsində çox böyük maraqlara malikdirlər.
BP-dən verilən məlumata görə, "İnam" strukturunda qazılması ehtimal edilən INX-2 quyusunun planlaşdırılması artıq yekun mərhələdədir. INX-2 quyusunda qazıntı işlərinin "İstiqlal" qazma qurğusunun vasitəsilə 2006-cı ilin ikinci yarısında başlanılması nəzərdə tutulub. Lakin yekun müddətin müəyyən edilməsi "Şahdəniz"də SDX-4 quyusunun qazılmasının başa çatmasından asılıdır.
Gürcüstanda BP dərinsulu IIA, IIB və III bloklarında iştirak payına malikdir. Bu layihənin tərəfdaşları: Anadarko - operator (48,0%), VR (28,5%), Türkiyə Beynəlxalq Neft Şirkəti (13,5%) və Şevron (Yunokal - 10%). Hazırda seysmik şəkillərin izahı davam edir.
