2006-cı ilin yanvar-iyun aylarında "Azəri-Çıraq-Günəşli" (AÇG) dəniz blokundan istifadə edən Azərbaycan Beynəlxalq Əməliyyat Şirkəti (ABƏŞ) müxtəlif istiqamətlərdə 8,632 milyon ton Azeri Light növlü neft ixrac edib və bu ötən ilin analoji dövrunə nisbətən 4,02 milyon ton çoxdur.
ABƏŞ-dən Trend ə verilən xəbərə görə, yanvar-iyun aylarında Bakı-Supsa boru kəməri ("Qərb" marşrutu) üzrə 3,541 milyon ton neft ixrac olunub, 2005-ci ilin yanvar-iyun aylarında isə bu göstərici 3,487 milyon ton təşkil edib. Bakı- Novorossiysk boru kəməri ("Şimal" marşrutu) ilə bu ilin yanvar-iyun aylarında 2,008 milyon ton neft, 2005-ci ilin yanvar-iyun aylarında isə 1,041 min ton ixrac olunub. 2005-ci ilin yanvar-iyun aylarında Gürcüstanın Batumi limanı istiqamətində göndərilən 84,4 min ton neftlə müqayisədə 2006-cı ilin yanvar-iyun aylarında bu istiqamətdə 2,603 milyon ton neft göndərilib. Bakı-Tbilisi-Ceyhan (BTC) boru kəməri ilə 2006-cı ilin yanvar-iyun aylarında 479,972 min ton neft ixrac olunub.
2006-cı ilin iyun ayında ABƏŞ neftinin ixracı 1,213 milyon ton təşkil edib. 2006-cı ilin may ayında isə bu göstərici 1,49 milyon ton olub. Bakı- Supsa boru kəməri ilə iyunda 607,003 min ton neft, 2006-cı ilin may ayında isə 600,85 min ton ixrac olunub. Bakı- Novorossiysk boru kəməri ilə 2006-cı ilin may ayında 332,502 min ton, iyun ayında isə 340,149 min ton ixrac olunub. Batumi limanına 2006-cı ilin may ayındakı 497,31 min ton neftə nisbətən iyun ayında 266,399 min ton göndərilib. BTC boru kəməri ilə iyunda 419,619 min ton neft göndərilməsinə baxmayaraq, may ayında bu göstərici 60,354 min ton təşkil edib.
