Azərbaycan Dövlət Neft Şirkəti tərəfindən "Azeri Drilling Company Ltd" birgə müəssisəsinin yaradılması dərin quyuları qazmağa imkan yaradacaq. "Hazırda ARDNŞ mütəxəssisləri "Bahar-2" perspektiv qaz yatağının işlənilməsi imkanları üzərində işləyirlər. Amma bunun üçün çox dərin quyuların qazılması lazımdır". Trend in xəbər verdiyi kimi, bunu ARDNŞ prezidenti Rövnəq Abdullayev bəyan edib.
Onun sözlərinə görə, köhnə texnologiyaların köməyi ilə bu prosesi həyata keçirmək çox mürəkkəbdir. "Köhnə texnologiyalarla 2 il ərzində ARDNŞ-in qazdığı quyuları BM 5-6 ay ərzində qazacaq", - deyə ARDNŞ başçısı qeyd edib.
Dərin sulu özüllərdən ilk quyular birgə müəssisə tərəfindən "8 Mart" yatağında qazılacaq. Bu yataqda cəmi 10 quyu qazılacaq.
2007-ci ilin sonuna kimi üç quyunun qazılmasının başa çatdırılması gözlənilir. Hər bir quyunun sutkalıq debiti 300-400 min kubmetr qaz olacaq.
Hazırda "Azeri Drilling Company Ltd" birinci quyunun qazılması üçün avadanlıqların toplanılmasını başa çatdırır. Qazma işləri 759 №-li dərin sulu özüldə həyata keçiriləcək. Quyunun dərinliyi 5800 metr təşkil edəcək.
Adıçəkilən BM-in təsisçiləri ARDNŞ (35 %), Panama Respublikasında qeydiyyatdan keçmiş "Target Petroleum Azerbaijan Corporation" (35 %) və Şotlandiyanın "First Drilling Limited" şirkətidir (30%).
Neft və qaz quyularının qazılması (o cümlədən horizontal və xüsusi qazma işləri), quyuların sementlənməsi və möhkəmləndirilməsi, mənimsəmə, əsaslı və yeraltı təmir, geofiziki tədqiqatlar və perforasiya müəssisənin fəaliyyət dairəsinə daxildir.
BM-in əsas vəzifələri ən müasir texnika və avadanlıqlardan istifadə etməklə "8 Mart" və "Bulla dəniz" yataqlarında dərin və çox dərin quyuların qazılması olacaq. Bu sahələrdə dərinliyi 6,5 min metrə yaxın 8 quyunun qazılması nəzərdə tutulub. Hal-hazırda "8 Mart" yatağında üç platformanın (730, 759 və 578 №-li) təmiri üzrə təcili işlər həyata keçirilir. Bu özüllər üzərində yeni qazma dəzgahları quraşdırılacaq.
