Azərbaycan, Bakı / Trend müxbir S. Babayeva/ Azərbaycanın İnternet provayderləri öz xidmətlərinə qiymətlərin aşağı salınması məsələsini müzakirə edəcəklər. Bu haqda çərşənbə günü Azərbaycan İnternet cəmiyyətinin başçısı, Azerin provayder şirkətinin baş direktoru Qalib Qurbanov məlumat verib.
Onun sözlərinə görə, bu məsələyə sentyabr ayının ikinci on günlüyünə planlaşdırılan Cəmiyyət üzvlərinin yığıncağında baxılacaq.
İnternetə qiymətlərin azaldılması Delta Telesom tərəfindən təqdim olunan beynəlxalq İnternet kanalın sürətinin bir neçə dəfə artırılması nəticəsində mümkün olacaq. Beləliklə, provayderlər keçmiş tariflərlə daha sürətli İnternet əldə edirlər.
Cəmiyyət başçısının fikrincə qiymətlərin enməsi Azərbaycanda genişhəcmli İnternetin - ADSL xidmətlərinin genişlənməsilə nəticələnə bilər.
Azərbaycan İnternet cəmiyyəti 46 fiziki və hüquqi şəxsdən ibarətdir. Rabitə və informasiya texnologiyaları nazirliyinin məlumatına görə bu gün Azərbaycanda İnternet istifadəçilərinin sayı 900 min. təşkil edir.
